連詩雅勇奪放題IQ王

最強娛樂資訊App《東網巨星》傾力打造鬥智遊戲節目《巨星放題》，節目從上月十日開始首播，話咁快已經陪伴了大家一個多月。經歷過六集初賽、兩集準決賽及上集終極之戰Round 1後，前日已播出大結局終極之戰Round 2，揭露終極冠軍！今集仍由三位星級考官「Dr.吹神」陳奕迅（Eason）、「Miss Kay」謝安琪（Kay）及「Professor Hins」張敬軒發問，參賽者繼續是四位女神連詩雅、周秀娜（Chrissie）、陳瀅及楊詩敏（蝦頭）。

Eason奉獻第一次

兩round決賽合共有六條難題，經歷過重重回合後，最後由智慧跟身高同樣高人一等的Shiga勝出，共答對四題半的她可謂由頭帶到尾，成功登上「放題IQ王」寶座！對於過五關斬六將勇奪冠軍，Shiga先High爆高呼：「好嘢！勝利係屬於我嘅！」隨即坦言沒想過會勝出：「好開心！我覺得每位星級主持嘅問題都十分難，我好盡力咁答，雖然有幾題答錯，但冇諗過都贏到，好多謝大家同我自己！今次呢個遊戲好好玩，問咗好多得意嘅IQ題，希望下次有機會再玩過！」對於Shiga大熱奪冠，三位考官不禁讚她聰明，Eason笑言要畀個叻：「佢都幾醒，因為我哋啲問題有啲好刁鑽，唔好話藝人朋友諗到爆頭，我都覺得難！」而Kay則說：「佢實力深不可測，我之前都睇好佢，依家證明我嘅眼光冇錯！」軒仔亦大讚對方美貌與智慧並重。

《巨星放題》播放以來反應非常熱烈，三位幽默盞鬼的星級考官功不可沒，對於擔任主持，Eason坦言為《巨星放題》奉獻第一次：「平時唱歌就唱得多，但做考官應該都係第一次，今次幾好玩，我覺得自己表現OK，不過可以再好啲，Kay、軒仔都出色！」他謂學識不少搞笑IQ題及冷知識，下次希望到自己玩：「下次有機會就掉轉角色，由佢哋發問，我哋答，到時睇吓我哋IQ有幾掂！」

而集可愛和索爆於一身的Kay出題時簡直冧暈一眾男士，對於主持表現，她讚自己表現生鬼，又自讚問問題表情幾好：「你答唔到我都可以解答你，都冧冧豬！我幾鍾意藝人朋友嘅反應，尤其鍾意傅嘉莉，佢講咗『梯形嘅面色』，好正！」

Kay彈老公渣

對於老公張繼聰無緣晉級決賽，Kay笑說：「比我想像中渣啲囉，佢以前追我嗰時扮到好似本百科全書咁，睇好多書，涉獵嘅層面好廣闊，估唔到佢答啱咁少，失禮呀！」講到老公在節目中讚她靚，Kay即扯開話題叫大家留意問問題的肥仔（Eason），之後她亦謂想參賽，更指若有份參加，成績會不錯！至於主持經驗豐富的軒仔亦表示做主持很好玩：「我以前喺電視台同電台都做過節目主持，可以考到一個人嘅反應同臨場應變能力，所以有機會都希望可以主持多啲呢啲益智節目。」

賽後回顧之決賽試題

第七集

Professor Hins：「船限載50人，第50位孕婦登船後船就沉咗，點解？」

Dr.吹神：「地球爆咗，咁要去邊？」

Miss Kay：「全世界最高嘅建築物位於？」

第八集

Dr.吹神：「長頸鹿條頸生得長，因為要食樹上嘅葉，咁點解猩猩鼻窿咁大？」

Miss Kay：「第一個喺紅館開演唱會嘅歌手？」

Professor Hins：「有位朋友不幸因車禍入院，佢家人趕到醫院向醫護人員問情況，醫護人員舉起五隻手指，然後家屬就爆喊，點解？」

第九集

Professor Hins：「汽水蓋上面點解有21鋸齒？」

Miss Kay：「邊個女演員獲得最多次香港金像獎女

主角？」

Dr.吹神拿出羽毛球狀的物體：「我手上拎住嘅係乜？」

第十集

Dr.吹神：「『天空之城』猜香港一個地方？」

Miss Kay：「唔畀Tips猜一位荷里活巨星？」

Professor Hins：「手指甲係日頭定夜晚，夏天定冬天生得快啲？五隻手指入面邊隻手指甲生得最快？」

答案

第七集

潛水艇

右邊

杜拜

第八集

因為猩猩手指粗，撩鼻屎時比較易入到窿。

許冠傑

三長兩短

第九集

根據力學原則，3點較穩定，所以用3的倍數。

張曼玉

電風扇

第十集

堅尼地城

畢彼特

日/夏天/中指