《萬千星輝頒獎典禮2015》紅地氈上花旦爭妍鬥麗，朱晨麗、唐詩詠及黃心穎等力谷上圍，令「無綫咪神」高海寧即時被比下去！而唐詩詠、洪永城及黃翠如同場時，翠如竟除下戒指送給洪永城逼他「預演婚禮」，令唐洪十分尷尬！採：影視組　文：專案組

朱晨麗最戰鬥格，以緊身裙夾出事業線，為靚連大氣都唔敢抖！

黃心穎的長裙十分性感，配上笑容就更甜！

洪永城與「舊愛」黃翠如和現任女友唐詩詠合照，企埋啲啦！

高海寧雖然穿低胸裙上陣，但效果不太明顯，「咪神」失威！

有愛情滋潤的陳凱琳，晚禮服都襯番心情，Pink！

楊怡以黑色喱士裙行紅地氈，高貴又大方！

一向是有料之人的陳煒冇令大家失望！

眾花旦盛裝打扮行紅地氈，全場最性感的要數穿窄身晚裝的朱晨麗，谷胸大騷事業線的她笑言因腰間位置曾改窄，故不敢抖大氣：「最緊要靚！我做咗安全措施（口架）啦！不過今晚唔可以抖大氣，要Lady啲。」

黃心穎火辣登場

至於黃心穎、陳凱琳及唐詩詠亦性感上陣，其中唐詩詠以白色透視低胸兼大露背示人，她自爆真空上陣：「其實係形象指導幫我揀，仲要今朝先喺以色列運過嚟香港，之前冇試過，見到咁已經冇得縮沙！（洪永城有冇見過？）冇人見過，佢頭先望咗一望話：『哦，係咁呀！』」而近日密密性感示人的陳凱琳笑言男友鄭嘉穎給予很大自由：「我鍾意着乜就着乜，佢話總之我開心就得。（拋胸都可以？）唔可以次次都咁嘅！」而黃心穎亦以火紅抹胸長裙谷到盡，反而身材一向逼爆的高海寧穿上深色晚裝，欠缺睇頭。

洪永城合照扭擰

除了一眾養眼女星外，紅地氈上亦發生小插曲，唐詩詠、洪永城及黃翠如齊齊接受訪問，黃翠如竟突然除下戒指並向洪永城說：「呢隻戒指好啱你哋！」令唐洪二人十分尷尬，洪永城更不敢接下戒指！被玩後，洪永城在記者三催四請才願意三人合照，更即場大讚女友漂亮：「佢件衫好靚。（頭先畀翠如搞到好尷尬？）我知我做戲係生硬，會檢討，我哋係好朋友，唔會尷尬！（唔接翠如隻戒指？）隻戒指聽講成億，跌咗賠唔起呀！（上台多謝唐詩詠？）一定會，多謝佢呢段時間咁照顧我！」