洪永城（Tony）及陳凱琳（Grace）捧走飛躍進步男、女藝員，Tony從女友唐詩詠（Natalie）手中領過獎座：「多謝陳展鵬教我做戲，多謝Natalie，如果漏咗返去要跪玻璃！」Tony在後台說：「Natalie頒獎特別難忘，都想慶祝，但聽朝開06，所以攬獎瞓覺！（唔攬女友？）可能佢今晚有獎！（對展鵬又愛又恨？）佢咁叻，咁有才華，畀咗好多啟發我！」而Grace被安排與曾狠批她揸槍樣猙獰的黃秋生閒聊，測出心跳達130！她得獎後眼濕濕說：「感覺少少似選港姐，媽咪喺現場，唔係佢鼓勵，我冇勇氣繼續，多謝TVB，作為新人希望做到Very Best！」她落台擁抱媽媽激動到喊，問到為何不多謝男友鄭嘉穎？她說：「太多人要多謝，之前我劇出街受打擊，多謝佢鼓勵，佢話屋企電視壞咗，希望陣間同佢食消夜！（秋生令你緊張？）成件事都緊張，得獎係鼓勵，飛躍獎比其他獎更重要！」

洪永城從唐詩詠手上接過獎座，梗係要攬一攬！

出爐「飛躍進步女藝員」陳凱琳開心得攬住媽咪喊。

姚子羚（左圖）與韋家雄獲得最佳男、女配角，心情當然激動！

另外，姚子羚憑《張保仔》奪「最佳女配角」，她喊住致謝：「冇諗過再攞，多謝TVB！好姊妹胡定欣、鍾嘉欣，睇緊電視嘅胡杏兒！（公布結婚？）冇諗。（唔多謝男友？）佢話唔使，呢度多謝番！陣間打畀佢，佢同丁子高睇緊直播。（待嫁？）攞獎要更努力做，結婚遲啲諗！」而韋家雄憑《梟雄》奪「最佳男配角」，他多謝秋生：「係秋生一句說話改寫我命運，多謝佢建議我演佢得力手足，唔係佢我冇呢個機會！多謝TVB畀我返嚟，如果唔係我攞唔到呢個獎！」他在後台稱要請秋生食飯：「我好好彩遇到秋生咁超班嘅人物！」