黃秋生胡定欣首奪無綫帝后

無綫《萬千星輝頒獎典禮》昨晚舉行，各獎項名花有主！視帝由兩奪《香港電影金像獎》影帝的神級演員黃秋生奪得，而憑劇集《鬼同你OT》叫胡的胡定欣大熱封后，首奪最佳女主角！憑《梟雄》入圍視帝的秋生獲觀眾激讚演技，在內部投票被睇高一線，稱帝順理成章！宣布賽果後，秋生與勁敵陳展鵬、黎耀祥及張繼聰擁抱，在曾傳不和的田蕊妮手上接過獎座，有講有笑，秋生搞笑地扮感動落淚，再以鍾景輝腔說：「都算有交代！以為攞完金像獎就攞奧斯卡。」引得全場大笑，接着他說：「我好珍惜呢個獎，聽講真係金！」提及梅艷芳獎座被拍賣一事，他說：「諗起過去呢個禮拜有啲獎座被拍賣，令我唔係咁開心，每個獎都代表好多人努力，要好好尊重！當然要多謝TVB、王心慰，佢好包容我，畀個咁好嘅角色我，仲有四個導演互相溝通，PA又醒目，仲要多謝梳頭化妝請公仔麵我食、請我飲茶。」

展鵬阿田「最受歡迎」

憑《張保仔》「十一貝勒」一角入圍的陳展鵬氣勢如虹，在新加坡、馬來西亞及「東網民選視帝」連中三元，又擁大批Fans，惟他首奪無綫視帝之路殺出秋生，最終與視帝寶座擦身而過，只得最受歡迎男角色，他說：「終於喺自己公司拎到第一個獎！今年同好多有才華嘅人合作，特別係《張保仔》！多謝我伯樂珍姐，佢帶我返嚟母校，我先有機會拎呢個獎，仲要多謝所有台前幕後嘅同事，同埋要多謝媽咪。另外有個好親嘅人要多謝，多謝佢由細到大嚴厲咁教我，令我冇行差踏錯，嗰個係我Daddy！」

同樣爭崩頭的最佳女主角以《鬼同你OT》兩位女主角胡定欣及阿田呼聲最高，昨晚則是定欣揮低阿田，「處女」封后！她聽到獲獎一刻已標淚，喊住擁抱阿田，宣讀得獎感言時泣不成聲：「冇諗過！我心目中Lisa姐（汪明荃）同阿田永遠都係最佳女主角，呢套劇覺得我仲有好多進步空間，下年同一個班底會拍新劇，我會盡200分力做好佢！特別係合作過好多次嘅祥仔（黎耀祥），多謝你！」

近10萬人投票

據知定欣在無綫日前舉行的盆菜宴不斷被邀合照如同預演慶功，可見內部員工對她的追捧，令她破蛋封視后！而衝擊二度封后的阿田憑「孫淑梅」一角贏得最受歡迎女角色，她哽咽地說：「今次係第一次做喜劇，多謝觀眾鍾意呢個角色！依家好多人話TVB啲劇追唔上潮流，唔啱時下年輕人睇，但我想講拍100部劇唔可以每一套都係經典，但所有台前幕後都好珍惜每個工作機會，好開心攞到因為我有付出過。多謝定欣同陳豪，特別係定欣，冇『姜蓉』就唔會有『孫淑梅』！」壓軸大獎「最佳劇集」由《梟雄》奪得，令《梟雄》錦上添花成大贏家！無綫今年增設「最受歡迎經典劇集」，「資深小生」曾江與胡楓擔任頒獎嘉賓，該獎項由全民投票選出，由經典劇集《大時代》以21,982票奪得，有份參演的曾江代為領獎。

今年投票機制分兩種，最佳男、女主角、最受歡迎電視男、女角色及最佳劇集五大獎，由全港市民及內部評審包括逾十名無綫高層及監製等業內人士投選，各佔50％。其他獎項如最佳男、女配角、飛耀進步男、女藝員及最佳節目主持等由逾4,000名無綫職藝員及評委會投選，同樣各佔50％。頒獎禮投票總數為582,194票，近10萬人參與投票。