盧凱彤埋葬過去30歲Reborn

盧凱彤（Ellen）前年舉行音樂會後，赫然發現情緒出現問題，求醫後證實患上躁鬱症，兩年來Ellen聽從醫生建議，準時食藥，加上家人與朋友的陪伴，病情已受控，儼如經歷一場「浩劫」的她亦變得不再收收埋埋，更再踏舞台開個唱，與歌迷再聚，心境經歷大轉變的她坦言零壓力：「今次我唔擔心會有情緒起伏，盡量想放輕鬆，好早前已經開始準備呢個騷，同埋我愈嚟愈識得處理自己情緒，同人一齊分擔自己難題，依家嘅我唔會將成敗睇得咁緊要，最緊要享受舞台，休息咗兩年都有咁多歌迷願意同我分享音樂，係難得嘅事，做音樂係一件好開心嘅事，兜兜轉轉都返嚟做音樂，係我嘅選擇！」

跨過生死重新出發

現年29歲的她推出新歌《29歲的遺書》，此歌曲亦正正是Ellen的寫照，希望在30歲時可以重新出發：「唔埋葬之前負面嘅記憶，唔會知道前面有更好嘅路，唔想拖泥帶水咁行，好想畀勇氣自己埋葬過去，想將29歲之前發生嘅事抹走，喺三字頭時重新開始，重新訂一個新嘅目標，新嘅人生，好多人都話三張開始先係人生真正嘅開始，踏入真正人生之旅，愈接近30歲愈信呢樣嘢，亦好期待30歲嘅來臨！」說起遺書，Ellen並沒有覺得「唔老利」，患上躁鬱症的確讓她恍如經歷生死一樣：「當自己抑鬱到一個好想放棄自己嘅地步，會發覺生死都唔係一個最大嘅挫折，而係唔肯去接受現階段嘅自己，對自己只有厭惡同拒絕，覺得成個世界都背棄你，所有人甚至自己都係你嘅敵人，喺我最難過嘅時候，唯一可以救到我嘅係要畀自己嘅情緒進入你，再穿過你，你要識得捱過嗰段時間，捱得過就可以打贏一場漂亮嘅仗。」

以前的Ellen只顧埋首工作，難得可以有休息時間，她卻覺得在虛度光陰：「以前嘅我冇乜私生活，淨係識做嘢，又唔畀時間自己拍拖，覺得一唔做嘢就唔知做乜，兩年前做完音樂會同朋友去咗冰島，去到嗰邊個人慌晒，真係太耐冇放過假，唔知點去放假，返到嚟覺得自己有事就去睇心理醫生，依家會同經理人夾好，唔會畀自己日日都有Schedule（時間表），放假我會留喺屋企睇吓電視，睇書同玩貓，有力就寫吓嘢，盡量令自己有番生活。」以往總是收收埋埋的她，亦不再在意別人睇法，放開懷抱接受不完美的自己：「以前會怕畀人睇穿，怕人哋唔鍾意自己，其實個個嘅性格都唔同，都唔知自己怕乜，呢個世界唔會有最叻嘅人，總會有人欣賞自己！」

不急結婚自覺幸福

多年來Ellen一直甚少提及感情事，講到結婚，她笑言另一半與她一樣，目前以事業為重：「有諗過結婚，但冇準備過，我覺得事業緊要過愛情，同埋另一半事業心都好重，大家亦少見面，我哋好新潮，冇諗過結婚之後就要生B，我未想好似Kary咁做師奶阿太住，好娘！我唔覺得咁樣先幸福，我依家都好幸福！」

化妝：Hubei Har

髮型：John Hui@Hair Culture

場地：day off cafe