王宗堯與莊思敏的對罵事件再有新進展!莊思敏日前喊爆指王宗堯斷其米路,王宗堯亦間接承認曾批評她是「老臨」,公司老闆蕭定一隨即下達「封口令」,事態見緩和。不過,王宗堯昨日以「足球論」力數莊思敏「後衞扮前鋒」要麻煩別人補位,又直指她未熟讀劇本,不知兩人仍有對手戲!採:音樂組 文:專案組

王宗堯再辣火頭,以「足球論」炮轟莊思敏,句句有骨!

蕭定一(圖)下令封口,豈料王宗堯當老闆冇到,繼續發炮!

王宗堯在活動上開開心心整班戟,可惜無助降火!

模而優則演的莊思敏(Jacquelin)近年作品多多,同時為《PG戀愛指引》及《導火新聞線》開工的她,因髮色及檔期有衝突而引發《導》片男主角兼同門王宗堯不滿,被指是「老臨」!日前,莊思敏出席活動時聲淚俱下哭訴不受尊重,並指王宗堯斷其米路,「要求」她不用拍《導》片,兩人針鋒相對隔空互片,事情一「髮」不可收拾!公司老闆蕭定一充當和事老「滅火」,勒令兩人封口,正當以為事情告一段落,王宗堯昨日出席《美亞廚具x安徒生會Santa Cooking Party》時卻按捺不住,以「足球論」再辣火頭!

「冇球星大過球隊」

一臉倦容的王宗堯在活動上與小朋友齊齊炮製班戟,有備而來的他首度開腔回應對罵事件,問到心情如何?他句句有骨,寸爆說:「真係想講粗口,已經收斂咗,冇辦法,唔想畀人覺得做新聞。劇組就好似足球隊咁,講Team work,曼聯有費爵爺(費格遜),喺佢領導下有『七小福』,有唔同崗位,前鋒、中場、後衞,叫你打後衞但走去做前鋒,影響晒球隊士氣!冇一個球星大過球隊,如果有人太自我,咁惟有放棄。(莊思敏太自我?)唔係講佢,球隊踢得好自然有票房同入座率,領隊都想場波好睇,唔踢假波,我哋做實事。」

他再三強調並非做新聞,又否認被老闆「照肺」:「冇照肺,我仲喺劇組,講嘢理直氣壯!」對於莊思敏直言彼此不是朋友,他再反擊:「呢啲嘢唔講得出口。(話你斷人衣食?)我唔知點叫斷人衣食,我有睇網民留言,話佢多棲多產、有家產,難斷!」問到事後可有與對方聯絡?他說:「佢都畀晒WhatsApp你哋睇,我好尊重老闆,導演、監製有溝通。」

提到莊思敏早前指與他在片中沒有對手戲,寸得興起的他再發言「狙擊」:「叫佢返去熟讀劇本先啦!我哋有對手戲!我係專業嘅,老闆決定維持原判,後衞堅持打前鋒,其他球員為場波好都會補位,要有團結精神,咪畀球員自我放大。(你踢得唔開心?)場波踢得差一定唔開心,但唔想輸。」再問到是否嫌棄莊思敏的金髮造型?他乘勝追擊:「咁佢話可以噴黑同戴假髮,到時實唔實淨自己睇吓囉!《導》片係大家嘅心血,唔想咁多是非同謾罵。(驚面左左?)我純天然,有表情可以做出嚟,有啲嘢大家有眼睇,唔需要做得太過火。」

Jacquelin:「老闆想佢收聲」

對於再度被王宗堯公開炮轟不專業,莊思敏回應記者查詢時說:「我唔會對佢講嘅嘢作任何回應。(覺得佢小器?)我冇必要講佢。(因為蕭定一下令封口?)係,咁佢又講?由佢講,我對佢嘅嘢冇回應。」她表示毋須為此失落,又暗示有人博宣傳:「冇乜嘢,覺得冇必要單單打打,我唔需要對號入座,除非佢講到好白,總之我尊重老闆意思。(想佢收聲?)唔係我講就得,老闆都想佢收聲,我控制唔到。(覺得佢咁樣係宣傳?)明眼人睇得出。」她其後在微博上載完成活動後帶友人B女飲茶的搞怪自拍,心情似乎未受影響。對於「封口令」失效一事,兩人的公司老闆蕭定一表示不作回應。