賣相精美又好味的德式班戟（Dutch Baby），最近俘虜一眾嗜甜女士的心，亦令模特兒林小美（Cherry）一吃便愛上！愛下廚的Cherry挑戰製作Dutch Baby，務求在聖誕節「呃Like」！她自爆視師姐倪晨曦為目標，期望平衡工作及生活！文：鄧雪儀

林小美跟住食譜炮製Dutch Baby，製成品似模似樣！

Dutch Baby賣相精美又美味，啱晒成班朋友開心Share！

倪晨曦師妹、外貌甜美的模特兒林小美早前為馬會擔任主持成為宅男新寵，主持技巧了得的她原來廚藝都有一手，可謂「入得廚房，出得廳堂！」愛烹飪的Cherry靠鑽研食譜令廚藝更上一層樓，有次與朋友High Tea時吃過賣相精美的Dutch Baby後便一試難忘，今次嘗試自製美食「複製」滋味：「Dutch Baby唔止好味，用焗盤上碟賣相都好靚，最啱女仔影相呃Like！出面賣得貴，我跟網上食譜試整先知原來幾易整，完全係零難度！自家製嘅好處係可以迎合個人口味，鍾意食咩材料就落多啲，如果怕肥可以落少啲糖，落多啲健康水果。」

愛心蛋糕冧男友

聖誕節將至，Cherry準備做大廚炮製美食，並邀請朋友到家中開派對：「朋友都鍾意我整嘢食，聖誕節準備煮小食同意粉請佢哋上嚟食，一大班人開Party過聖誕特別有氣氛！當日我都會整Dutch Baby，賣相咁靚，應該會大受歡迎！」不論是中菜還是西式菜，對Cherry來說都毫無難度，擅長炮製甜品的她自爆會為男友親手做生日蛋糕：「另一半每年生日，我都會整蛋糕畀佢，雖然出去買個蛋糕會更加方便，但覺得親手整有誠意同有心得多，相信對方收到自家製蛋糕都會零舍開心同Sweet！」

Cherry最近完成電影《紀念日》的拍攝工作，談到首次演出戲份重的角色，她坦言有一定壓力，平日會藉下廚減壓：「今次演出嘅角色係入行以來戲份最重嘅一次，都有一定壓力。我覺得受壓時會煮嘢食放鬆吓，由準備食材到烹飪期間都係得一個人，可以畀空間同時間自己沉澱吓。加上成功煮到一道菜會帶來好大嘅滿足感，可以Cheer up！」

食得輕盈冇時停

為了以最佳狀態上鏡，Cherry一直保持纖瘦身形，秘訣是少吃多動，她說：「我本身唔係瘦底嘅人，加上都幾鍾意食嘢，所以早、午餐都食得豐富，晚餐就輕盈啲，淨係食蔬菜同肉。如果去旅行暴飲暴食肥咗，我會食沙律代替正餐，只節食一餐健康得多！我都有做帶氧運動嘅習慣，最近仲打泰拳，可以燃燒脂肪同塑造身體線條，一舉兩得！」她又自爆視師姐倪晨曦為學習對象，坦言最想在繁忙的工作中仍能兼顧健康生活：「我本身好鍾意Elva，仲視佢為女神！我覺得佢好叻，平時工作咁忙，要身兼模特兒、演員同瑜伽導師三職，但佢都好注重健康，會親自煮健康餐同做瑜伽。反而我一忙就兼顧唔到健康，只會Focus喺工作上，所以好想學佢咁平衡到工作同生活！」