一代歌后梅艷芳(阿梅)轉眼間已逝世12年,此時此刻其遺物竟第二度被拍賣!阿梅生前委託管理遺產的信託公司,繼兩年前拍賣其遺物後,近日再將逾3,000件遺物拍賣,就連阿梅的貼身內衣褲都以底價100元拍賣,讓人不勝唏噓。身為阿梅徒弟的譚耀文昨日怒轟拍賣遺物一事,說到激動處更泣不成聲,哽咽說:「即使賣到十億都係一種侮辱!」文:專案組

譚耀文希望拍賣停止,更激動到喊!

梅媽指內衣都拍賣是侮辱兼肉酸!

已故歌后梅艷芳逝世12年,逾3,000件遺物近日公開拍賣。

梅艷芳於2003年12月30日因子宮頸癌病逝,走畢40年的精彩人生,其璀璨的舞台歲月令人無限懷念!但隨着阿梅的離開,其遺產不斷引起風波,其故居的逾400件遺物於2013年被拍賣,轉眼兩年,近日遺產管理人滙豐信託在網上舉行《LAST BUT NOT LEAST-最後芳華》拍賣會,阿梅的逾3,000件遺物再被拍賣,包括最具價值的新秀冠軍獎座及金像獎最佳女配角獎座等,還有她的日常用品如高跟鞋、毛公仔及梳化,底價由100至10,000元不等,而阿梅的貼身內衣褲竟以底價100元拍賣,本月30日便是阿梅逝世12周年,卻於此時被拍賣內衣,令人萬般感慨!

「傷害全世界梅艷芳嘅歌迷」

阿梅生前對幾位徒弟都關懷備至!徒弟譚耀文得聞師傅遺物被拍賣後,昨日在微博怒轟,誓要捍衞阿梅尊嚴。他昨日接受本報電話訪問時表示心如刀割:「我真係心痛!已經喺微博表示我嘅不滿,作為梅艷芳徒弟、朋友同所有歌迷,都唔願見到咁嘅情況,點解要用拍賣形式,我知可能最終會落喺歌迷手上,但經過咁嘅競投、拍賣,係一種侮辱,絕對係一種侮辱!」說到激動之處,他泣不成聲,哽咽說:「侮辱咗一個為香港付出咁多嘅巨星、影后、歌后,你用百幾二百元底價拍賣佢啲私人嘢,即使賣到十億都係一種侮辱!」

他希望即時停止拍賣,有關單位及歌迷會合力解決事件:「傷害咗全世界梅艷芳嘅歌迷及朋友嘅心,點解要咁做?」他表示如果有人性的話,信託公司可用另一種方式轉讓,例如歌迷會用文字或合約去見證代收遺物,放在一個有紀念性的地方供人欣賞:「點解信託公司唔可以做呢樣嘢?點解唔可以做呢樣嘢?」他甚至提出為信託公司籌錢:「如果信託基金唔夠錢運作,我可以叫所有徒弟、朋友、生前老友去做慈善演唱會籌款囉!」阿梅另一徒弟何韻詩則不作回應,而徒弟組合草蜢至截稿前仍未有回覆。

梅媽鬧肉酸賤格

阿梅年屆92歲高齡的母親覃美金,早年曾多次打官司爭取女兒遺物,她表示對今次拍賣遺物毫不知情。她昨日接受本報電話訪問,一聽到內衣也拍賣即冷笑道:「聽歌迷講十幾廿蚊一條吖嘛!認真抵死!(想買番啲遺物?)我都唔識電腦,加上我都冇錢喺手。」她指此舉徹底羞辱阿梅,並炮轟信託公司:「內衣都拎出去拍賣,侮辱、肉酸、賤格!(信託公司事前有聯絡你?)邊有呀?拎出去賣都同我講?」提到兩年前阿梅的遺物曾被拍賣,梅媽表示當時有名熱心歌迷Eva為她拍賣了一張枱:「依家仲放喺屋企,佢今次話想買兩個獎畀我添!」

至於信託公司在2013年拍賣會上聲稱遺失新秀冠軍獎座,如今獎座被拍賣,信託公司方面昨日接受訪問時冇正面回應:「獎座係包括喺遺物裏面,而今次嘅角色只係遺產管理人。」事隔兩年再拍賣,信託公司指今次是最後一次。