身為新人的林小美（Cherry）近日有份參演電影《紀念日》，首次飾演較重戲的她深感壓力，更「緊張大師」上身不斷背台詞及排戲！而自爆有男友的Cherry，直言認定對方為結婚對象，還想辦傳統的中式婚禮。

林小美雖然客串不少電影，但今次是第一次孭重戲，又緊張又期待！

林小美自爆名花有主等結婚，唔怪得笑起上嚟特別冧！

鄧麗欣與方力申主演《紀念日》，「下屬」林小美學嘢喇！

林小美曾客串多部電影，最近在新戲《紀念日》孭較重戲，飾演鄧麗欣（Stephy）的下屬，演戲經驗尚淺的她坦言感到壓力：「今次係我入行以來戲份最重嘅一次，加上自己仲係新人，都擔心會演得唔理想，所以拍之前都狂背台詞，又搵人幫我對戲。不過Stephy份人好Nice，令我拍戲時都放鬆得多，我都喺佢身上學到好多嘢。」

主持演員包辦

工作多多的Cherry早前為馬會擔任主持，問到較喜歡做主持還是演員？她說：「其實我都鍾意，因為兩項工作都具挑戰性，拍戲唔單止係背熟台詞，仲要消化再加埋個情感演出嚟，同埋又可以挑戰唔同角色，新鮮感大啲，亦都充實啲。而做主持會見識到好多嘢，學習到唔同新事物。」

等男友「過大禮」

Cherry又自言對婚姻有憧憬，希望能跟足傳統大搞中式婚禮：「我骨子裏係個傳統小女人，到時結婚要跟足傳統，做齊過大禮等儀式，我仲希望可以着裙褂戴龍鳳鈪咁出嫁！」

已有對象的她仍未有結婚計劃：「以前會想30歲前結婚，但未來嘅事好難講，所以都係順其自然。（認定咗男友係結婚對象？）希望係佢啦！可以陪我一直走落去。」

文：專案組

服裝：bread n butter

場地：VS Media