田蕊妮與胡定欣以雙視后姿態挑戰無綫視后，明言會狙擊對方！阿田坦言獎項不嫌多，但大讚勁敵胡定欣表現出色，定欣則謙稱奪無綫視后獎尚有距離，仍需努力前進，有幸成為大熱已非常高興，又睇好勁敵阿田及汪明荃跑出！

胡定欣不在意獎項，最緊要演技得到觀眾認同。

胡定欣（左）與田蕊妮的「神同步」成為熱話，雙方演技同樣出色！

阿田講到明恨攞獎，絕不輕易認輸讓出視后寶座！

早前在劇集《鬼同你OT》憑「神同步」的精湛演出，田蕊妮與胡定欣率先在《TVB馬來西亞星光薈萃頒獎典禮》史無前例地成為「雙視后」，兩人又齊齊成為本月13日舉行的《萬千星輝頒獎典禮2015》候選視后！論演技，阿田略勝一籌，但論兩人在劇中的默契，卻又難以分割，似乎今次亦考起一眾評審！

認輸？No Way！

阿田兩年前已憑《巨輪》的「姚文英」一角一嘗視后滋味，演技獲肯定，與定欣在《鬼》劇的表現出奇合拍，獲觀眾激讚，阿田說：「冇諗過觀眾反應咁好，咁定欣啲戲不嬲OK，今次係第一次合作，估唔到又咁合拍！印象最深係大家認為『神同步』嗰幾場戲，初頭排嗰時真係未得，壓力比較大，但正式拍又好快搞掂。（邊個好啲？）嘩！我唔識畀分，總之拍得好開心！」

提到無綫視后只得一個，她坦言恨攞獎：「獎項代表大家認定咗你，邊會嫌多！對自己梗係要有信心！（讓畀定欣？）咁又唔得！相信評審都公平嘅！（又兩個一齊拎？）OK喎！咁咪皆大歡喜囉！」

大熱倒灶都滿足

定欣則笑稱，馬來西亞的雙視后賽果令無綫視后寶座鹿死誰手增添刺激性，但自言仍需努力：「睇好汪明荃同阿田，對自己有信心，但需要努力先拎到。（之前阿田話爭贏咗視后個心會唔舒服，如果你贏會唔會有同感？）當然會！不過人哋話我係大熱已經好開心，贏唔贏冇所謂，今次成數都未必高啦！我仲有改善空間嘅！」

文：影視組