童年時經歷父母離異的吳綺莉，逾三十年未見過父親，直到其相依為命的母親10月逝世，激起她萬里尋父的決心，經親友取得父親的聯絡方法。豈料父女倆仍遠隔重洋，患飛機恐懼症的她要突破心魔，才能越洋見身在美國的父親！

吳綺莉因母親逝世而激起尋父決心，可惜要先克服飛機恐懼症才可見面。

吳綺莉希望有機會帶女兒見外公。

吳綺莉自誕下女兒吳卓林後，母女相依為命，原來她的童年也在沒有父親下度過，1歲時經歷父母離異，其後隨母親生活，與父親失去聯絡！直到10月母親逝世，她在微博感嘆多年未見過父親，近日她決心千里尋親，經親友取得父親的聯絡方法，解開逾三十多年的心結。昨日她在鞋履設計比賽活動上細訴尋親詳情：「我諗起幾十年冇見過爸爸，好彩我搵到朋友幫我聯絡上佢，但同爸爸仲未有正式聯絡，佢一直喺美國。」儘管對父親的印象不深，但她清楚記得最後一次見面：「最後一次見佢係喺街撞到，當時我11歲，見到面幾分鐘，再對上一次見面就係3歲時。」

帶女兒見外公

即使取得聯絡方法，但兩父女仍是間關萬里，越洋尋父對吳綺莉而言困難重重：「除非佢嚟香港，否則好難見面，因為我好驚搭飛機，我有飛機恐懼症好多年。」早年她與母親由上海來港時，便因避免搭飛機而選擇了搭至少三十小時的火車。問到將來會否帶女兒見外公，她說：「有機會一定帶！」活動後她接受本報記者電話訪問時，將尋父的喜與悲娓娓道來：「其實聯絡爸爸冇難度，但我最近一直好忙，未得閒消化吓呢件事。（心態上未準備好？）可能係，都係其中一個因素。（卓林知道外公的事？）未，佢依家得16歲，遲啲先話佢聽。」她又笑言對父親的印象很模糊：「我淨係記得好多人講我同爸爸個樣好似。」問到聖誕節如何與女兒慶祝，她說：「我聖誕節要喺畫畫中度過。（囡囡點過聖誕？）本來想同佢一齊離開香港，點知發現我Passport（護照）過咗期，去唔到，變咗佢都同我一齊留喺香港。（你搞到佢去唔成？）其實佢都可以去，但我唔放心，可能佢見我唔放心，所以都唔去。」

葉玉卿：會幫手！

而身在美國的葉玉卿亦在朋友圈中聽聞吳綺莉提及尋父一事：「佢過嚟我無任歡迎，雖然知道佢有飛機恐懼症，但好耐之前已叫佢的起心肝，同個女搭一次飛機過嚟，佢要搵爸爸，我都會幫手！」

文、攝：專案組