黃秋生「空降」無綫重返拍劇，憑精湛演技殺入頒獎禮角逐「視帝」；與此同時，後輩陳展鵬挾着新加坡和馬來西亞「視帝」之名狙擊，令「視帝」之爭白熱化！文：影視組

秋生重返無綫拍劇大受歡迎，卻表示唔恨拎獎。

坐擁兩個視帝獎座的展鵬希望再下一城，成為「三連冠」。

秋生憑《梟雄》成為大熱，「天哥」角色深受觀眾喜愛。

展鵬在《張保仔》中與陳凱琳鬥戲，演技出色屢獲肯定。

影帝黃秋生「空降」無綫拍攝台慶劇《梟雄》，耀目的演技令劇集生色不少，順理成章以大熱姿態殺入《萬千星輝頒獎典禮2015》角逐「最佳男主角」，問到有否信心問鼎視帝？他說：「我就希望黎耀祥拎嘅，我唔係因為唔想拎而畀佢拎，而係以生意角度嚟睇，個獎對佢利益大啲，佢的確演得好。我唔係謙虛唔想拎，如果無綫真係頒呢個獎畀我，我亦都真係多謝嘅。唔係話講到我好牙擦咁話唔拎個獎，只可以講我唔係好恨，但又唔係唔稀罕。」問到信心有多大？他自問每次演出都全力以赴：「我冇Hea過，認真做戲先係我享受嘅時候，所以我好鍾意呢份工。」

同被睇高一線的陳展鵬，早前於新加坡及馬來西亞的電視頒獎禮中憑《張保仔》奪得視帝，今次再入圍角逐，隨時一年內「三連冠」，連奪三地視帝。問到有否信心？展鵬表示放了很多時間在工作上，若能拿到當然會開心：「其實我從來冇話要得到乜嘢獎項，只希望做到想做嘅嘢，希望做出嚟得到觀眾共鳴。」

佩服Bobby角色多變

對於今屆有不少前輩級的演員齊角逐，展鵬說：「黃秋生係我偶像，不過我最想係黎耀祥或歐陽震華拎，佢哋每年拍好多劇，每次都係唔同嘅角色同劇種，要每次演出都保持水準係一件相當困難嘅事。」不過，他表示奪得兩個視帝獎的確為他打了強心針：「多謝大家對我嘅認同與支持。」

化妝：Jolinn Ng

髮型：Jeff Ng

場地：港威酒店