35歲李泳漢宣布與女友於明年結婚，據悉他奉子成婚雙喜臨門，但問及會否邀請泳豪前女友楊思琦飲喜酒，他卻嬲爆地說：「佢當年咁樣傷害泳豪，我請佢都唔敢嚟啦！」

泳漢與未婚妻下月結婚，雙喜臨門，可喜可賀！

泳漢影婚紗相，帶埋父親李家鼎、母親施明及泳豪去。

泳漢攬住未婚妻咀嘴，十分甜蜜！

泳漢有未婚妻餵蛋糕，零舍開胃！

泳漢與未婚妻行街睇BB用品。

搭扶手電梯時，未婚妻從後攬住泳漢。

楊思琦與李家關係欠佳，當然不獲邀請去飲！

藝人李泳豪的孖生哥哥李泳漢，將與拍拖約兩年的圈外女友嚴佩鈺（Conny）於下月八日結婚，據知奉子成婚的二人屆時在馬會擺喜酒，泳漢近日滿心歡喜籌備婚禮，不過提到會否請泳豪舊愛楊思琦去飲時，他說：「點解要請佢？我請佢都唔敢嚟啦！（仲嬲緊佢？）唔好講嬲，係唔想提佢啫！呢四年全家都唔係咁好過，豪仔發生件事嗰個年頭，佢話同豪仔結婚嘛，點知件事變成咁，佢仲話番我哋轉頭，對全家都好大傷害，呢四年連細佬會唔會拍拖都冇諗過，但依家有個天賜嘅禮物，我可以結婚，所以唔開心嘅嘢我唔想提！」

「佢應該知道我阿媽感受」

對於思琦已為人母，會否戥她高興？泳漢說：「唉……佢都做咗媽咪，佢應該知道我阿媽當初嘅感受。（思琦係咪應還個公道畀泳豪？）我諗個事實觀眾已經知道，佢還唔還都冇分別，我只係想『楊思琦』呢三個字、呢個人，唔好再同我屋企有牽連，我結婚，傳媒都會問到佢，所以我答一次，我今次名門正娶，希望佢唔再同我家人有瓜葛！（思琦有冇同豪仔或你家人講對唔住？）絕對冇啦！邊度有呀！冇再聯絡。」

睇完BB衫餵蛋糕

而全權負責婚禮費用的泳漢，日前與未婚妻及家人前往拍攝婚紗照，問到會否準備豪華婚禮給太太?他說：「豪華就講唔上喇！我冇乜錢，只係將自己最好嘅嘢畀我太太。（去邊度蜜月？）本來飛去關島，但依家取消咗，老人家唔太贊成。」泳漢與Conny雖然相識多年，但一直甚少聯絡，直至2011年發生思琦劈腿事件，Conny主動慰問關心，之後他們繼續聯絡，加上Conny同樣喜歡馬術，直至2014年初才正式單獨約會，順其自然走在一起。

另外，泳漢日前與Conny現身九龍塘行街，兩人又睇BB衫、BB床等嬰兒用品，之後逛書店，並不時在育嬰書籍部徘徊，行完書店兩人搭扶手電梯時，女友從後攬住泳漢，其後他們手拖手到附近餐廳醫肚，期間見Conny恩愛餵未婚夫食蛋糕，認真Sweet！食飽飽，兩人乘的士到附近婚紗店揀結婚相，現場見他們不時頭貼頭研究，泳漢最終將揀相話事權交給未婚妻。