莊思敏哭訴 王宗堯砸人飯碗

有份演出電影《PG戀愛指引》及《導火新聞線》的莊思敏，日前在社交網留言：「如果工作是等於唔尊重工作咁我祝你冇工開啦！」及後又上載「黑面相」，帶弦外之音留言：「立即變黑，得咗……面都得，何況頭髮呢。啲人見識真係少…」雖然留言中並無指名道姓，但無獨有偶，《導》片男主角王宗堯在莊思敏留言前一日曾在社交網聲稱有人不尊重工作：「如果你為出鏡曝光就咩都做，你只不過係去襯……如果你是為數字而拍戲而不是為真正的用心去表演，咁你同老臨有咩分別？」隨即引爆二人不和傳聞！

據知，導火線是因莊思敏同時為《PG》及《導》片開工，染了一頭金髮的她原定在《導》片飾演記者，後期接通知要飾演談判專家，故要把頭髮變黑，莊思敏遂用上髮型產品幫助，卻惹人不滿。莊思敏昨日接受本報記者電話訪問時說：「每個人都應該尊重番同業，我理解唔到佢嗰句，咩係開得工多就等於臨時演員？咩叫為一個數量而開工就同臨時演員冇分別？呢句說話我諗係令好多演員都唔開心。」她續說：「臨時演員都係演員，我理解唔到佢呢句說話，淨係覺得有啲唔尊重嘅成分，加上我肯定呢句說話係衝住我而嚟，所以我唔高興係好正常。」

王：佢想見報咋！

莊思敏又指不需要有「人」去教導自己：「我唔認為兩套戲角色有咩衝突，你話我喺造型上，可能嗰個髮型嘅顏色配合唔到，呢樣嘢大家都知有好多髮型產品幫到手，我覺得所有嘅說話都係一個藉口。」最後她表示會繼續拍《導》片：「我唔會因為佢任何一句說話而唔演。」

至於王宗堯回應亦間接承認「老臨論」是指莊思敏：「不多作回應啦，我指嘅係你有冇尊重每一個劇組每一個角色，珍惜你每一次演出機會。撞期同造型角色都有衝突，佢唔願意遷就，咁不如專心啲。（莊思敏話唔開心！）我覺得佢想見報咋！（咁你有冇叫佢專心拍一套？）唔講啦，費事老闆冇面，我好錫身邊啲人同公司同事。（老闆要你封口？）所以唔為啲無聊嘢令大家難睇，我最想《導》片有好成果，唔會畀任何事破壞佢。」

而莊思敏昨晚出席活動時再為風波解畫，她起初眼紅紅，及後聲淚俱下，一度喊到講不出聲，聲稱不受尊重：「王生好堅決覺得我唔適合做呢個角色（談判專家），佢叫我同老細講做番記者（角色），我有同老細討論呢件事。咁我不如公開畀大家睇吓我哋之間嘅對話啦，既然有人覺得自己講嘅嘢理直氣壯，我都可以好光明正大咁話畀大家知發生緊咩事。」

莊：從來唔係朋友

及後莊思敏公開與王宗堯的對話內容（見附圖），內容是王宗堯說了一句：「我同老闆講不如你專心拍PG啦！」莊思敏回一句：「吓！」對此，莊思敏直言感到委屈：「我唔理解一個人可以咁樣做，斷人衣食者猶如殺人父母，咁點解作為一個演員佢可以決定另一個演員嘅演出機會呢？（佢話你唔願意遷就角色？）一路都講緊我可以噴黑彩或者戴假髮，我話唔可以染番黑髮，因為連緊戲，我都要尊重番另一個劇組，同埋檔期從來冇撞過。（點解決？）唔需要去解決，我諗佢有啲說話講咗，就得啦，明喇！」她直言雙方不是朋友：「從來都唔係朋友，之後都唔係。（面左左？）同公司見到咪見囉，公司咁多人，唔需要一定要講嘢！（繼續拍套戲？）喺我立場，我接咗就應該繼續做。（同佢多唔多對手戲？）係冇！（冇對手戲佢又干涉你？）我唔明囉所以，點解佢要管埋我嘅角色，我亦唔理解佢憑咩去挑戰、評價人哋嘅演技。」她表示經理人公司老闆蕭定一未有就事件聯絡她，更強調與王宗堯以往並無過節。