「狗癡」黃貫中鍾情極具霸氣的藏獒，家中目前飼養了三隻的他，試過有賊人意圖爬入屋，被他的藏獒嚇得滾出屋！

歌手黃貫中（Paul）是愛狗之人，尤其鍾情稀有名貴的西藏獒犬，最高峰時期更飼養過十二隻，目前則擁有三隻，而阿Paul連日來在微博與粉絲及愛犬人士分享養藏獒心得，前日詳述帶愛犬「沙展」到獸醫處剝牙，但手術期間因麻醉藥已過，阿Paul即親手幫藏獒剝牙。他昨晨又上載太太朱茵與另一隻藏獒「酋長」的合照，酋長企高達1米83，比朱茵高個幾頭，龐大身軀估計是朱茵三倍大，極具霸氣。

幾千呎大宅養狗

阿Paul昨日透過訊息回覆指家中的三隻藏獒分別是酋長、沙展及山蒂：「三年前你哋影過嗰隻係寶帝，係媽咪，不過寶帝死咗之後，爸爸泰山太傷心，幾個月後都走埋，可見藏獒係幾咁長情。」他又指酋長會追飛機咬，而沙展則愛追電單車咬：「山蒂淨係鍾意打交，估唔到狗女係最好打嗰隻。」他又分享早前發生的一件趣事：「最好笑有次望住閉路電視，有兩條友擒入我間屋，藏獒唔一定會吠，佢會細細叫一聲，然後匿埋喺一個地方等你爬入嚟，呢啲就係真正恐怖嘅警衞犬，我見到嗰兩個人連跑帶跳咁滾出去，係操普通話，嚇到黐咗線，自此我識得嘅朋友屋企被打劫過，我都會送一隻藏獒畀佢，但佢屋企要夠大，起碼要幾千呎先可以，如果細細間就好虐待隻狗。」

霸氣十足的藏獒體形龐大，最少也有70至80公斤，阿Paul的沙展就有130、140公斤，他說：「藏獒有個特性，佢聞到有血緣嘅人唔會咬，我搵親生細佬試過。」

詐死應對襲擊

阿Paul直言藏獒本身好惡：「你唔會行去摸，正如你見到隻老虎，你伸隻手埋去摸係你攞嚟！」他又教大家被藏獒襲擊時的應對措施：「要好似熊人詐暈、幾痛都要詐死瞓喺度，佢會放過你。養藏獒嘅人唔會驚自己隻狗，但我唔希望啲人亂咁養，要做一個負責任嘅狗主。」

文：音樂組