繼上次剝裙後，戴夢夢又做出驚人行為！最新一期《好報》拍得她又與太極鼓手朱翰博（Ricky）吵大鑊，更在男友開車期間打開車門三度「企跳」，可是夢夢似乎不知悔改，昨日堅稱是落車非跳車之餘，更發爛渣！

夢夢被問到「企跳」一事時，擺款兼發爛渣。

《好報》拍得夢夢在男友Ricky駕車期間，發脾氣開車門「企跳」！

Ricky

最新一期《好報》又拍得戴夢夢做出能人所不能的行為！繼夢夢五月底在街頭發男友Ricky脾氣，做出四度剝裙的驚人壯舉後，她又被《好報》拍得她與Ricky於上月23日晚上在街頭吵大鑊，Ricky揸車回家期間，身為乘客的夢夢三度打開車門「企圖」跳車，Ricky見女友行為如此過火，立即爆粗鬧爆夢夢：「你點對我呀？我揸緊車你跳車？你閂唔閂X門呀？我話X畀你聽，如果有差佬嚟，你即刻玩X完！」

怒睥呼喝記者

夢夢「企跳」事件爆出，引來全城熱烈討論！夢夢昨晚到銅鑼灣出席活動時，面對記者提問時全程擺款兼發爛渣，對於「企跳」，她說：「冇乜嘢啫！唔係大件事，啲相係上個月影到，我哋都唔記得喇！（又嗌交？）情侶少不免有磨合，小事！」問到是否覺得行為過激？她愈來愈躁：「你哋問埋呢啲問題，我唔答！」問到為何次次出街都嗌交？她即反問記者為何要成日影她？問為何打開車門「企跳」？她竟說：「唔係！我只係想落車！」

Ricky：呢啲嘢成日都影到！

再問到是否知道犯法？她立即怒睥記者，令現場氣氛充滿火藥味，並說：「總之好小事，我哋感情好好！」然後示意工作人員推開記者，當記者再次圍埋再問她跟Ricky何時結婚？她即表示不想再講，問到是否不滿Ricky離婚未辦妥？她即呼喝記者，沒有理會問題，並說：「畀我行啦！」當有記者表示以後不再問她問題，她知驚，立即死死地氣說：「私人嘢唔講喇！」

而她昨日現身韓國天王Rain的演唱會發布會時，當被問到是否嬲男友因未辦妥離婚而發脾氣及為何打開車門，以及是否知道犯法？她即煞有介事刻意迴避，只說：「唔答！唔答！」然後離去。

至於幾乎被夢夢玩謝的Ricky回覆本報時，竟然覺得夢夢「企跳」是「碎料」：「其實呢啲嘢成日都影到，我覺得好普通，我食緊飯，唔講喇！拜拜！」而夢夢舊愛、堪輿學家陳定幫卻認為夢夢行為非常危險：「我都係啱啱睇片先知，真係幾危險！我理解唔到點解佢咁做，可能係鬧得太犀利先咁做！」問到以前跟夢夢拍拖有否遇過類似行為及是否覺得她有公主病？他說：「以前又唔覺佢係咁！」對於是否覺得因Ricky未搞掂離婚才這樣？他說：「唔清楚！冇聯絡好耐！」再問是否睇好「夢朱」結婚？他暗寸夢夢：「唔回應！不過我要講一句乜都要安全第一，要遵守道路規則！」

文：專案組

攝：追蹤組