日前歌手許廷鏗出席有關欣賞服務業的活動，他說：「試過有次我去食消夜，有個清潔姨姨一個人清潔緊，執剩幾張枱，我食完都特登執埋啲碗筷拎過去畀佢。」講到飲食業中有傳聞對服務員態度差會被「加料」，他笑說：「呢啲江湖傳聞嚟啫！我就試過另一種加料，嗰次食白松露，可能因為我個樣為食，眼甘甘望住佢刨，結果佢刨大份啲畀我！」

許廷鏗將出碟，笑言最啱做聖誕禮物！

另外，他預告將與同公司的胡鴻均同期出碟，談到兩兄弟會打對台，他笑言可以一次過買兩隻碟：「年尾聖誕節，買碟仲可以當禮物送畀人，我隻碟都好啱做聖誕禮物 ！」