亞視藝人楊正軍一向是潛水發燒友，最近成功考獲潛水教練牌照，希望亞視開拍旅遊特輯，帶觀眾潛入水底世界。可是長期在戶外暴曬的正軍慘變「人肉黑炭」，並大嘆港女鍾情小白臉，令他的桃花運直線插水。文：音樂組

楊正軍曬得一身古銅膚色，陽光味十足！

迷上潛水的楊正軍，想帶更多人睇海底世界！

楊正軍約在四年前到台灣墾丁旅行時，因緣際會下「處男下海」接觸潛水，在海底世界探險半小時後，便深深迷上了這項水底活動，他說：「之後返到香港，有另一個藝人叫我不如一齊去學潛水，最後就上咗癮，去墾丁住咗大半個月，當地可以潛水嘅地方我都幾乎潛晒！」

想「秘撈」帶隊

最近正軍成功考獲潛水教練牌照，由助教正式升呢成為教練，剛與亞視續約的他坦言希望可以雙線發展，投入幕前工作之餘，也可以「秘撈」帶隊欣賞海底：「想帶多啲人睇海底世界 ，覺得海底係另一樣嘢，不過之前試過教人浮潛，帶啲小朋友去玩真係幾難！因為浮潛距離有限制，佢哋又唔聽話，擔心佢哋會危險。」

食大咗肥40磅

現在公司主力做兒童節目的正軍希望嘗試不同範疇，不介意主持婦女節目或成人節目：「依家亞視比較單調，少機會發展，我有建議過亞視開旅遊節目，但都要等。」自從迷上潛水後，正軍曬得一身古銅色，但他大嘆陽光男孩似乎在香港不太受落：「玩潛水之後覺得異性緣差咗，可能香港女仔唔鍾意男仔咁黑，個個話我似舊炭，加上玩潛水後我食多咗嘢，由100幾磅去到140幾磅，當係轉形象！我依家都白唔番啦！」