靚聲歌手胡琳破天荒與香水品牌合作，揚言要打造一場香氣飄逸的演唱會！她自爆特別迷戀戀人的香氣，曾瘋狂到集齊前男友混合用的三隻香水，噴到衣服上，以感受常在身邊的感覺！

即將開騷的胡琳，希望透過香氣牽動樂迷的情緒，同時Present自己的「熟」女味道。

珍藏不少香水樽的胡琳，細訴對香水的情意結！

歌手胡琳將於月中假演藝學院開騷，更會與香水品牌合作，她自小已有儲香水樽的習慣，其中一款瘋狂收集的是以蘋果造型風靡少女界的系列：「第一次接觸係細個偷用媽咪嘅香水開始，到有經濟能力後見到樽靚就會儲，呢個Nina嘅系列我好鍾意，靚之餘，背後又有白雪公主同亞當夏娃兩個好純潔又黑暗嘅故事，題材特別！」

入行九年 偏向成熟

胡琳覺得香水恍如人的「第二層皮膚」，不同味道代表人的魅力，與音樂會中「Body And Soul」意念不謀而合：「到時唱《香薰》時，全場都會噴Nina另一條新Line嘅香水，同蘋果嘅少女味唔同，呢隻味個感覺會神秘感高啲，令人聯想到赤裸裸、毫無保留去Present自己畀大家睇。」她笑言入行九年，已非初出道的少女，故香水會偏向選擇成熟的味道。

熱戀期愛得「變態」

談到有些人愛將熟悉的味道與記憶聯繫在一起，胡琳指有幾個男朋友的味道在記憶中特別深刻：「我個人都幾憑味覺去記人，曾經有個男朋友會將幾隻香水撈埋一齊噴，我試過瘋狂到搵出佢搽邊幾隻味，再買返去噴喺啲衫度，得閒就嗅吓。」胡琳講完即面紅及笑問是否很變態，她解釋是發生在熱戀期：「搽咗佢嘅香水就好似每日喺身邊咁，但分開後都會稍為避開，唔會再嗅嗰隻味！」