藝人陳志健（Otto）早前憑劇集《張保仔》「敖小虎」一角贏得網民讚賞，更帶挈他「賺外快」的機會：「前幾日我去咗澳門拍旅遊節目，係幫出面啲網拍，都算係外快，拍檔係足球評述員依雯，我哋去咗好多唔同景點，我喺3D立體館着咗MJ（米高積遜）招牌服裝，學佢擺招牌45度傾斜甫士！只留咗一日，但見到好多Fans都嗌我做『小虎』，感覺親切！（《萬千星輝頒獎典禮2015》冇提名，有冇失望？）冇乜所謂！拍得開心最緊要，網民鍾意我嘅演出已經好好，而且我老婆（羅苡之）都頒咗個獎畀我，每年可以遇到一個好角色已經好安慰，期望下年遇到更好角色。」

陳志健化身黑版MJ嘟嘴擺甫士，自得其樂！

與拍檔依雯一拍即合的陳志健，到澳門搵錢之餘順道會粉絲。