祥嫂與鄧家畫上問號

洪金梅與四名子女鄧兆尊、鄧兆榮、鄧小艾及鄧碧玉再起紛爭，昨日她透過黃夏蕙前經理人Simon發放五條聲帶，以及兆尊等人要求她所簽的法律文件，Simon解釋有人拒交2,000萬遺產稅，以致祥嫂再跟子女不和。

着易地而處

訪問中，祥嫂的態度明顯軟化，她哭訴爭產事件纏擾18年，自責當年沒悉心照顧子女，導致他們長大後不受教，自言71歲高齡人士的她說：「坦白講都嗰頭近，仲何必爭一日之長短，尤其同自己所出嘅，我都有不足之處，顧得掂老公又疏忽咗子女，希望社會人士唔好對我兒女有成見或歧視，佢哋入世未深、良莠不齊。」她現奉勸子女「以和為貴」及「易地而處」，並說：「最緊要掉得番轉呀紅衞兵！我唔介意喎！你點糟質，我仍以祥嫂為榮，我頂得順，如果當日唔係顧住你老竇我老公，第五、六任『祥嫂』上來就冇你哋存在，點解你哋唔體諒我呢？」

祥嫂又坦言極力反對新馬師曾賭博，自爆當年曾在新馬師曾胞妹陪同下墮胎，新馬師曾卻到俱樂部消遣，她坦承對方輸了「大數目」，心灰意冷的她更拉新馬師曾跳樓，又表示幾個戶口當年僅餘200萬存款：「呢200萬唔係畀祥哥賭，係用來買物業、買地。（輸清200萬？）都差無幾囉！佢真係對我唔住，連兒女教育金都輸埋，你都唔係輸埋我嘅私己錢！」又指母親患糖尿病、血壓高、心臟血管閉塞，故該流動金乃預留的醫藥費，又憶述未嫁前新馬師曾仍未名利雙收，兩夫妻同甘共苦捱出頭。

小艾不欲回應

最後，祥嫂宣布回復自由身，與鄧永祥家人畫上「問號」，表示不再回應有關鄧家的事，問到會否捨不得？她說：「終歸切肉不離皮，血濃於水，希望有生之年可以扶持佢哋一把，佢哋係壞係曳，但唔係毒瘡，點可以割？」更爆喊指與洪家也畫上「問號」，寄語子女要自愛、自立、自我檢討。對此，鄧小艾接受電話訪問時說：「唔想再答。（相關行動？）乜都唔會做。」鄧兆尊則於截稿前未有回覆。

文：影視組