陳瀅、張家瑩、陳智燊與未婚妻宋熙年昨日出席「滴達國際呈獻：熱愛時間」鐘錶大賞展覽，陳瀅自爆已有一年沒休假：「新年、聖誕節會放假返溫哥華。（今年大豐收？）係！想換大車獎勵自己，依家揸細車畀人蝦。（搵男朋友做柴可夫？）可以請司機。」

陳瀅（左）與張家瑩擔任模特兒示範腕錶，各具美態。

張家瑩則透露年初收到一隻價值約廿萬、鑲滿鑽石的手錶，但拒絕透露是否由追求者送贈，只透露是好友所贈。單身的她明言想找結婚對象生BB，所以擇偶時不想過於倉卒。

提到葉家寶欠薪罪成，她坦言非常擔心，期望對方獲輕判：「判決嗰日會去支持佢，上星期都有去法庭，聽到佢罪成都戥佢心痛。佢用心良苦，不停為員工發聲，唔希望佢坐監，祝福佢。」並大讚家寶如爸爸般疼錫她。