現年28歲的鍾采羲早年出過寫真集，火辣身材與性感形象俘虜不少宅男，最近更跟導演王晶簽約成為「晶女郎」，全身投入影、視圈發展外，又盼望一洗「口靚模」形象，努力琢磨演技做個「實力派」。同時，擁有一顆恨嫁心的她又自爆四、五年後會「閃婚」！

唔講唔知，原來鍾采羲早已有「結婚計劃」！

鍾采羲希望洗去「口靚模」形象，以演技取悅觀眾！

鍾采羲參演《爛滾夫鬥爛滾妻》後，又拍《鴨王2》。

刻下的鍾采羲，無懼艱辛從頭學習。

有「E Cup Iris」之稱的模特兒鍾采羲（Iris），參演電影《爛滾夫鬥爛滾妻》及《唐伯虎衝上雲霄》後，跟導演王晶一拍即合，早前正式簽約成為「晶女郎」，由模界踩入影、視圈大展拳腳，她說：「依家電視、電影簽晒畀佢，我想專注電影發展，因為模特兒嘅發展空間喺現今市場愈來愈窄，加上自己都試過模特兒工作，年紀又大喇！依家大個女想做啲實質啲嘅嘢。」

賀爾蒙失調暴脹

決心全情投入大銀幕的Iris，希望擺脫以往「口靚模」形象，飾演更多角色，實行來個大洗底，可謂雄心壯志！她說：「依家目標想拍多啲唔同嘅電影，等外界認識我係個演員，諗起我拍過乜嘢作品，而唔係個性感模特兒。」

自去年宣傳《唐》片後，閉關近大半年的Iris，自爆患病導致身形暴脹，更遭老闆下令減肥十磅，她否認因壓力致病：「個半月肥咗十磅，因為賀爾蒙失調，我好快就發現，即刻食藥調理，依家慢慢好緊，可能瞓得差，一直唔太注意身體，生活冇規律。」

戒酒戒蒲勤減磅

以往喜愛夜蒲的Iris更揚言戒酒、戒蒲養身：「我唔係驚影響形象，我唔覺得飲酒消遣係一個問題，但要適可而止，唔可以影響到工作同身體，唔係年紀輕就要停，飲酒傷身體，會影響女仔嘅外表、狀態。」

體重時高時低的她笑言惟有「長做長瘦」努力減磅：「我要對自己要求愈Keep愈高，健康、外表、減肥唔係為一部戲，或者一、兩份工作而做，係要成為長期生活習慣。」

想演咩角色？

加盟新公司後，Iris先後獲邀演出新片《賭城風雲III》和《鴨王2－雞同鴨戀》，自問演技還需要琢磨，並謂不再是「玩票性質」，決定跟名師學做戲，又不時向老闆王晶虛心請教：「老闆話最緊要睇多啲電影、睇吓人哋點做，又叫我得閒拍片多啲睇番自己，就會見到自己嘅問題、有進步嘅空間，佢好好人，叫我慢慢嚟，仲會畀意見我，話我有進步空間、繼續努力，應該覺得我有希望啩，唔係都唔會簽我啦！」正所謂「萬事起頭難」，Iris無懼艱辛從頭學習，又認為各行各業都有起步點：「以前讀設計都係由實習做起，到做模特兒時，我好Green，講嘢、擺甫士乜都唔識，我覺得所有行業都係由零開始，經過慢慢進步嘅過程。」

問到想扮演甚麼角色？自稱大笑姑婆兼傻大姐的Iris說：「聽講想喺電影行業做得好，應該做啲同本身性格完全相反嘅角色。」雖然她不介意演任何角色，但盼望能飾演極端的角色：「我幻想過做一個邊緣少女，一開始非常壞、誤入歧途又吸毒，後來慢慢變成社會棟樑做律師，我覺得好勵志，好想話畀年輕人聽，只要努力去改變思想、行為就乜都會發生。」

富家女賺錢靠自己

家底豐厚的Iris向來予人感覺敢作敢言又愛蒲，私下閒聊過後，發現她個性率直又Down To Earth，且事業心非常重，不但衣着樸素、沒有全身名牌，更堅持努力賺錢靠自己，絕非一名拜金有錢女！拍照時，Iris向攝影師虛心學習，務求擺出靚甫士，以最佳狀態示人。

點樣揀老公？

談到感情方面，Iris突然自爆恨嫁：「其實我係諗住過幾年結婚，但點都好，目前工作都要做好。」問到有否結婚對象？她笑說：「暫時未有，希望幾年後有！（打算閃婚？）我係想閃婚，我唔介意閃婚，如果搵啱對象的話，天時地利人和，時機、緣分到，閃婚係可以接受。」預計最快四、五年後做人妻，坦言擔心遲婚會遇上生育問題：「女仔完整人生應該有完整嘅家庭同小朋友，所以唔想太大個先有BB。」豈不是現在要開始物色對象？以工作為重的Iris說：「依家要整理好自己先，再睇吓有冇適合對象。（擇偶條件？）最緊要對社會有貢獻、對家人負責任、愛我就夠。」

文：影視組

攝：吳文聰