「男人幫」的任賢齊、黃家強、蘇永康及梁漢文前晚舉行紅館騷頭場，對感情事低調的小齊一反常態高調跟太太錫錫晒恩愛，他更笑說：「唔通錫家強老婆咩？」

黃家強（左起）、任賢齊、蘇永康及梁漢文前晚舉行紅館騷頭場，四人獻唱時施展渾身解數。

任賢齊一反常態，高調跟太太咀嘴晒恩愛！

梁漢文唱到瞓地，十分搞笑。

蘇永康（左）與李宗盛大放笑彈。

任賢齊、黃家強、蘇永康及梁漢文（Edmond）組成的「男人幫」前晚於紅館舉行《男人幫演唱會2015》頭場，四子施展渾身解數，家強更大騷舞技，自封「舞」大郎的他緊張到忘了手拿咪高峰唱歌！小齊則在演出時走近太太，高調來個嘴對嘴！

李宗盛求教追港女

四子頭場請來李宗盛做嘉賓，並拿他開玩笑：「佢鍾意香港美食、美景同香港美女，連囡囡都係『香港製造』！」小齊又指學好語言必須找當地人做女友，一直單身的李宗盛則表示在後台問小齊追求香港女生要說哪句話，小齊提議「小姐想不想去看金魚？」隨即被蘇永康笑指想跣李宗盛！

其後記者問家強跳唱時忘了拿咪高峰，他說：「左右手唔知點擺。（老婆笑得好開心！）難得大家開心。」Edmond又指蔡一智想家強加入草蜢做新成員！問小齊何以高調跟太太晒恩愛？他笑說：「唔通錫家強老婆咩？」家強即反擊說：「你試吓，因住我老婆鍾意咗你！」

家強否認鬧黃貫中

問到家強在演唱會「四個人最緊要一條心」的肺腑之言是否經今次合作後改觀？他指四子合作有不少娛樂，再問Beyond是否沒有娛樂？他說：「細個都有，但大個就少，好多嘢可以變質。」而葉世榮曾於訪問中直指覺得家強與黃貫中嗌交很失禮，家強說：「有好多嘢唔係我可以掌握到，我冇鬧交，從來冇鬧過佢（黃貫中），我重申！」

文：音樂組 攝：黎志輝