粵劇名伶龍劍笙（阿刨）下月假灣仔演藝學院歌劇院舉行十六場《紫釵記》，故近日忙於與兩位新進花旦李沛妍與鄭雅琪排練。提到阿刨未來再開騷的可能性，丘亞葵說：「阿刨答我：『睇緣分啦！』」

丘亞葵（左起）、鄭雅琪、阿刨及李沛妍相當緊張《紫釵記》的演出。

對於會否再開騷，阿刨表示一切隨緣。

阿刨（右一）與李沛妍（左二）及鄭雅琪飾演情侶，故要培養感情。

龍劍笙（阿刨）近期忙於與兩位新人李沛妍及鄭雅琪排練《紫釵記》，前晚前往探班的新娛國際負責人丘亞葵（Vigo），被問到阿刨的排練進度時說：「阿刨對《紫釵記》實在太熟，對佢嚟講冇難度，佢排練得好輕鬆，阿刨再演出係一心想盡自己嘅能力去幫助新人，等佢哋可以做好啲。」問到阿刨對兩位新人有何指點？丘亞葵說：「阿刨成日都講：『喺台上最緊要做到自然、順暢。』套劇已經排到好熟，因為戲裏面阿刨同佢哋做情侶，依家阿刨最重要係同佢哋培養感情。」

對於成功購買門票的戲迷來說，阿刨的十六場《紫釵記》固然令人期待，但冇飛在手的戲迷更關心阿刨何時再開騷，對此丘亞葵說：「阿刨九月返嚟香港，明年一月中演出完就會返溫哥華，我都問過佢好多次會唔會再演，阿刨答我：『睇緣分啦！』我就相信希望在明天。」

激讚兩花旦

另外，兩位花旦李沛妍與鄭雅琪難得有阿刨悉心指導，自然大有進步。丘亞葵亦大讚她倆對長輩的態度恭敬：「李沛妍同鄭雅琪唔單止對阿刨好恭敬，對其他長輩都係咁，好難得。」

文：影視組