近期人氣急升的陳煒昨日出席劇集宣傳，首次角逐視后的她受寵若驚，揚言睇好《華麗轉身》的汪明荃。笑言攞過三次視帝已「死而無憾」的黎耀祥表示爭視帝冇壓力。

祥仔雖然不看重獎項，但仍努力拉票。

眾人玩遊戲，餅碎周圍飛，相當搞笑。

一班粉絲撐場為陳煒打氣。

翠翠表示老公食素準備生仔。

三屆視帝黎耀祥（祥仔）、陳煒、葉翠翠與關禮傑等昨日出席台慶劇《梟雄》宣傳活動，席間，眾人又大玩食水泡餅兼鬥大聲，噴到祥仔一手餅碎，非常惹笑。期間，有份角逐視帝視后的祥仔和陳煒趁機拉票，兩人均獲大批粉絲撐場。

超額完成一生無憾

首次競逐視后及入圍「最受歡迎電視女角色」的陳煒坦言好開心：「好多嘢發生，近期突然好受大家關注，受寵若驚。（有信心攞視后？）信心唔大。（對手太強？）當然啦！個個都係好演員，大家都有一班忠實粉絲，有好多Noise畀我已經好開心。」她表示最睇好《華麗轉身》的汪明荃，又指好友兼時裝設計師何國鉦將為她設計戰衣，而她希望《梟雄》能勇奪「最佳劇集」。

談到跟黃秋生與劉松仁等好戲之人爭視帝，祥仔自稱向來冇壓力，只享受過程與製成品，能否獲獎則隨緣：「我都攞過三次，對任何人嚟講呢個成績都好滿意，我一生都死而無憾，再攞唔攞都唔係特別重要，因為已經獲得市民肯定，相反希望多啲新演員攞，畀多啲鼓勵佢哋。」

葉翠翠夫妻搞對抗

祥仔強調始終是公司的重頭活動，只要拍劇就自然獲得提名，故他無法宣布不攞獎，他又點名大讚王浩信及張繼聰好戲，更笑稱陳展鵬和蕭正楠均上晒位，未來是新一輩小生的世界。

提到早前因肚痛缺席宣傳活動，翠翠解釋純粹腸胃不適，並非懷孕，但坦言與老公有計劃生BB，又自言已上網研究生仔或生女的秘訣，更計定日子「造人」：「未開始（造人），但計劃緊，原來有好多嘢要準備，首先食嘢要健康又要早瞓，老公依家都戒酒，佢幾乎全食素，因為食素係生仔。」翠翠又自爆兩夫妻搞對抗，皆因她想生女，老公則恨生仔。談到每日餐單由她話事，她笑說：「我每日都飲豬肉湯，每日都話飲唔晒畀佢飲。」正看中醫調理身子的她笑言老公向醫師自誇「身體無敵，乜問題都冇。」她又爆《姊妹淘》一班姊妹很關心生育話題。

文：影視組