鄧麗欣（Stephy）成立的自家排球隊「Loey」，昨日參加《第34屆全港公開馬拉松排球賽（公開組）》比賽，Stephy因身在澳門而未有出賽，僅10名隊友應戰，處於下風的Loey未有放棄每一球，出盡力殺波及碌地接殺球，卻未能扭轉局勢，直落兩局以19比21落敗被淘汰，期間見教練肉緊地指手畫腳，更兩度叫暫停，與球員商討對策。

專程到澳門睇男友鍊車的Stephy，對Loey輸波處之泰然！

身為隊長兼老闆的Stephy昨日透過電話否認為捧男友方力申場而缺席球賽：「（輸波）唔緊要，當經驗，最着眼係出年三月嘅聯賽，因為要升班！（輸三分唔抵？）輸就輸，排球就係咁，一分都係輸，冇辦法！」