邱美薇芭蕾夢未央

邱美薇實屬「舞」林中人，學了17年芭蕾舞的她坦承對芭蕾舞又愛又恨，一方面芭蕾舞培養了她對戲劇的興趣及提升自信心，與此同時，亦為她帶來滿身傷患，醫生跟她說過因為膝頭傷完又傷，不能再跳芭蕾舞，可是她誓不放棄！

Chelffy的一字馬十分完美。

抬腳是芭蕾舞的高難度動作，Chelffy跳起來卻輕輕鬆鬆。

學了17年芭蕾舞的Chelffy自爆滿身舊患。

Chelffy穿上足尖鞋，輕易做出掂腳尖動作。

1.先把內側的絲帶圍住腳踝繞大約個半圈，然後繞外側的絲帶。

2.將兩條絲帶在腳的內側打結。

3.把兩條絲帶的尾部攝到絲帶入面。

自小練習芭蕾舞的Chelffy，曾因考試備戰而跳到腳甲瘀黑。

Chelffy（右）在音樂劇《Singin in the Rain 萬花嬉春》中飾演群舞員角色。

足尖鞋（左）及軟鞋的功用有所不同。

藝人邱美薇（Chelffy）外表看似活潑好動，原來是芭蕾舞高手，身穿芭蕾舞裙的她隨着音樂優雅地跳舞，高難度動作亦難不倒她，輕易做出一字馬、掂腳尖、抬腳等動作。擁Advanced 1等級的她4歲開始習舞，最初學舞是因為媽媽擔心身為家中獨生女的她會悶，慢慢她開始愛上芭蕾舞，就算中三後要到英國讀書，仍繼續堅持學舞，中六、中七時亦有副修芭蕾舞舞蹈課程，大學時更想修讀芭蕾舞教育課程，做芭蕾舞教師：「但考唔到，結果大學讀咗表演及視覺藝術學士學位，但冇完全放棄芭蕾舞，大學放暑假都有返香港上吓啲興趣班，之後返咗嚟香港，雖然依家工作唔係向芭蕾舞方面發展，但都會一星期上一堂芭蕾舞，亦唔再係之前咁為咗考試，而係想輕鬆同調劑吓繁忙生活，依家都有啲成人芭蕾舞課程，可以紓緩平時壓力、Keep Fit同矯正腳形。」

初學拉筋最難

學了17年芭蕾舞的Chelffy坦言起初最難是拉筋，因為不拉筋就做不到擘腳動作，但熟習後卻不難。講明是習舞之人，Chelffy身上當然有不少「歷練」，她試過為考試努力備戰而跳到雙腳腳甲瘀黑：「好多力會墜咗喺腳趾公度，令我腳趾公腳甲位瘀咗，初初唔敢着涼鞋，後來就諗反正啲腳甲都係瘀咗啫，不如搽黑色指甲油。」

拗柴膝傷等閒

除了腳甲瘀黑外，拗柴亦屬等閒，令她印象最深刻的是有次考試接近尾聲時突然拗柴，但她卻硬着頭皮頂硬上：「考試嗰陣基本上已經麻醉咗，唔覺得痛，但一跳完就幾咁辛苦。」各種傷勢加加埋埋令她滿身舊患，現時右腳腳眼位比左腳鬆，膝蓋及腰都曾經歪過，很多內傷、舊患會不時復發：「好似老人家咁，其實跳芭蕾舞好多時都係隻腳傷過會一直繼續傷，尤其是一直跳冇休養過，曾經有醫生同我講冇得再跳芭蕾舞，因為我膝頭已經傷過，我以前真係傷到試過上樓梯都痛，依家就Keep住做啲器械訓練，強化隻腳就好少少，冇以前咁嚴重。」

儘管如此，芭蕾舞確為Chelffy帶來很多好處，如培養了她對戲劇的興趣和提升自信心，對她現時工作有很大幫助，亦令她得到不少工作機會：「細個都有參與一啲芭蕾舞劇，而且好多舞蹈其實有芭蕾舞底跳係容易好多，我2014年都試過因為識跳Tic Tac舞而做到音樂劇《Singin' in the Rain 萬花嬉春》入面嘅一個群舞員角色。」

喜愛藝術型男

優雅的芭蕾舞亦可培養女孩子高雅的氣質和儀態，但Chelffy卻笑言在她身上發揮不到作用：「其實我覺得自己好粗魯，完全係同芭蕾舞超極端，我啲朋友都話睇唔出我識跳芭蕾舞。」

男孩子似乎對識跳芭蕾舞的女孩子情有獨鍾，那她可有因此引來不少狂蜂浪蝶？她說：「中學嗰陣有，佢係因為好少識得啲女仔識跳芭蕾舞，所以就走去識我做個朋友，唔係話拍拖。（識男仔希望對方有藝術天分？）我都係鍾意啲有藝術細胞嘅男仔，我之前講過話鍾意啲運動型男，但唔係淨係外表，內涵都好緊要，但佢唔一定係要識跳芭蕾舞，其他舞都得。」