曾志偉、陳百祥（阿叻）前晚與今屆多位準視帝齊齊演台慶趣劇，阿叻先後向黎耀祥及黃秋生面部噴水，馬國明則突然「甩褲」，當場呆樣，場面搞笑，幸內穿長褲「打底」。而志偉更逐個窒，對陳豪說：「你個樣咁攰，晚晚搞嘢嚟呀？」之後笑言是指「搞奶粉」，接着寸黃宗澤：「睇你個樣都係畀女飛！」另外，秋生原本沒有於趣劇名單上，他解釋：「都奇怪，因為一早Mark咗期，入到嚟就收到稿。（大材小用？）冇所謂啦！我都幾耐冇混過吉。」

馬明無啦啦甩褲，比他演出的趣劇對白更有喜劇效果。

黃秋生與黎耀祥扮「母女」，對白惹笑。

李思捷及單立文重演掌摑事件，嘟嘟作勢阻止。

梁烈唯、古明華及吳業坤「反串」跳肯肯舞，揭開真身時全場驚喜！

鄭裕玲被窒嗒「小鮮肉」

至於鄭裕玲於「小生法庭」環節上互相鬥嘴，陸永大膽問她有否拍拖？她說：「你個癡漢！喺巴黎就知你暗戀我！」陸永說：「唔怕醜！你想嗒我呢個小鮮肉！」她反擊：「我當你係識食垃圾嘅豬！」全場爆笑，而單立文與李思捷分別扮謝賢與曾江重演「掌摑事件」，又傳「證人」胡楓與Joe Junior，Joe搞笑繼續遞咪收音。