前藝人鍾麗淇昨日於網上興奮地透露日前順利誕下重7.5磅的二女Michela，母女平安健康，她盛讚囡囡乖巧：「佢好乖，大家都平安！」至於好友湯盈盈、周家蔚及文頌嫻指鍾麗淇佗B過程充滿正能量，又讚BB女可愛！

鍾麗淇上周「四條一」當日誕下次女Michela，老公Nardone Ruggero陪伴在側。

Isabella由爸爸抱實，跟妹妹Michela打招呼。

大女Isabella，次女Michela。

湯盈盈讚可愛：佢哋充滿正能量

淡出幕前轉教瑜伽的鍾麗淇（Margaret）自2010年與中意混血丈夫Nardone Ruggero拉埋天窗，及後誕下患上罕見病「四號染色體缺損綜合症」的大女Isabella，今年Isabella已4歲，Margaret積極與大女齊心抗病，更於今年中宣布懷有四個月身孕的喜訊。當時Margaret表示雖然已為高齡產婦，大女亦有罕見病症，但她會做足產檢，更明言無論結果如何，必定會誕下BB，相當勇敢積極。

大女不停錫妹妹

佗B期間，Margaret不時腹大便便出席活動，昨日她於網上自爆上周三（11月11日）已順利誕下重7.5磅重的次女Michela，又大晒兩位囡囡的萌爆合照，留言透露大家均身體健康外，更冧爆表示大女不停向妹妹獻吻，令她十分窩心！Margaret接受本報記者電話訪問時，開心地表示母女平安，又讚B女很乖：「我哋OK呀！依家我忙住湊佢，佢好乖！我哋返咗屋企，大家都平安，我覺得自己依家好幸福！」

BB鼻頭似意籍爺爺

湯盈盈表示已前往探望老友Margaret，又讚對方充滿正能量：「有探佢，佢哋好好，BB好可愛！（之前Margaret懷呢胎時有冇擔心？）醫生檢查過冇事就OK，佢懷孕全程好Positive！」至於周家蔚則笑言估計Margaret於坐月後便會急不及待重做高溫瑜伽：「佢話好掛住高溫瑜伽，因為佗B冇得做，我估佢坐完月會即刻去焗一焗！」問她知否Margaret會否追多個仔時，家蔚說：「大家都應該唔會住，生完要感受吓應唔應付到先。」而文頌嫻因感冒，仍未往探B女，稍後將相約眾姊妹前往探望，她透露Margaret每日於聊天群組更新寶貝女的照片，大讚BB高高的鼻與Margaret的意籍老爺相當似樣，問她Margaret之前有否擔心第二胎，她說：「佢向來開朗、正面，完全唔使大家擔心。」

文：影視組