胡杏兒日前宣布與男友Philip訂婚，並定於下月28日舉行婚禮。她昨日出席慈善步行活動時透露，跟未婚夫着手籌備婚事多時，對傳於Ritz Carlton設婚宴一事，她默認並表示「胡說八道會」一眾成員將擔任姊妹團：「好多朋友未請，因為之前未講得住，希望盡快定人數，大概50圍。」

杏兒出席活動時與導盲犬合照，將為人妻的她心情靚爆！

杏兒表示會請舊愛Bosco飲，「再見亦是朋友」！

朋友冇尷尬

問到會否邀請舊愛黃宗澤（Bosco）出席？正在擬定賓客名單的杏兒大方地說：「會，如果佢得閒，希望佢出席。但我知佢好忙，我生日佢都有Send Message畀我。（會唔會尷尬？）唔會，大家都係朋友。」對於有網民叫Bosco「搶親」，她笑說：「拍戲咩！呢個係現實生活，大家睇得戲太多喇！（老公知你請佢？）知！佢都好支持同歡迎。」

想生三胞胎

杏兒又透露婚後將請假兩個多月，計劃與老公周遊列國度蜜月。她更難掩喜悅冧爆說：「佢成日叫我有地方想去就好去喇！（想生BB？）佢好想，我想一次過生三胞胎。」她又表示跟老闆蕭定一簽約前已提及結婚事宜，好讓老闆有心理準備。