張美妮前年升呢人妻,但婚後工作接踵而來,亦參演了重頭劇《巨輪2》!劇中與趙永洪有感情線的她慨嘆與老公黃偉強的二人世界時間愈來愈少,希望拍畢此劇能兩公婆出外旅遊,尋回拍拖的甜蜜感覺。劇接劇雖然令美妮做煮飯婆的機會減少,但她從未忘記慰勞老公是每個妻子的責任,堅持親手煲明火靚湯給老公飲:「想佢返到屋企感受到溫暖,我覺得男人係需要呢樣嘢!」文:陳丹 攝:嚴偉國 場地:decor collection帝家設計@銅鑼灣

自言是「超級完美主義者」的張美妮,享受精神緊張的感覺。

張美妮慶幸老公喜歡她的Baby Fat。

無論工作多忙,張美妮都會煲靚湯慰勞老公。

張美妮曾與老公黃偉強暢遊意大利的威尼斯坐貢多拉。

張美妮(右起)、劉思希、蕭正楠、田蕊妮和阮兆祥拍攝《巨輪2》員工聚餐的戲份。

曾經在《拆局專家》扮老妝的張美妮坦言雖然貪靚,但不怕為工作犧牲靚樣:「唔介意扮醜、搞笑,好想完全冇包袱咁豁出去!」有份參演《巨輪2》的她又表示能跟隨劇組出Trip令她異常興奮,能享受「小別勝新婚」的滋味:「喺《巨輪2》同趙永洪有感情線,我哋之間會發生好多事,好考我演技。而且我從未試過拍劇有得出Trip,今次有得去澳門真係開心,好似畀個空間我同老公分開一下,見番又可以好Sweet!今次同楊明、趙永洪同徐榮一齊去,大家係同一期訓練班,好似同同學仔一齊去玩咁,諗到就開心。」

煲靚湯慰勞老公

連同《巨輪2》,美妮首次擁有5套存貨未播出,令她感受到前所未有的滿足感:「好開心結咗婚反而更多工作,而且老公好Support我,試過拎劇本返去同佢試對白,佢投入唔到又講得唔順,所以都係放棄。但佢見到我有工作都會好開心,而且我一拍劇就完全唔理啲生意畀晒佢搞,我覺得咁樣一齊努力好幸福。」

雖然工作忙碌,但美妮從未忘記賢妻的角色,回家不忘慰勞老公:「一定會煲湯、買啲靚嘅補品,我同佢做嘢都忙,已經唔可以成日照顧佢嘅生活所需,又唔可以日日煮飯,呢樣嘢其實我都有啲內疚,所以盡量煲吓靚湯等佢返到嚟有啖湯飲。放假嘅話幾攰都好,我都一定會去街市買條魚、買斤菜煮飯佢食,雖然係好簡單嘅餸,起碼畀佢知雖然老婆做嘢忙,但都想佢返到屋企感受到溫暖,我覺得男人係需要呢樣嘢!」

為工作經常失眠

大半年都忙拍劇,美妮坦言與老公二人世界的時間愈來愈少,希望拍畢《巨輪2》後與老公去旅行放鬆:「同佢都年幾冇去旅行,好想同佢拍吓拖!自己喺《巨輪2》都有愛情戲,突然覺得真係要同老公拍吓拖,搵番啲戀愛嘅感覺!我想去沖繩,陽光與海灘好Relax,唔係想周圍Shopping。」

劇集拍攝期間,美妮對妝容一絲不苟,對拍攝效果十分上心,她亦坦言是一名「超級完美主義者」,雖然辛苦,卻「自虐」地享受精神緊張的感覺:「凡事我都唔想出現任何缺點同瑕疵,唔想後悔!尤其喺工作上,大家都知無論做咗幾多準備工夫,上到台都會扣啲分。每一次做完嘢返到屋企,成日都會諗到失眠,好執着喺啲小缺點上,依家都盡量叫自己放鬆啲。雖然辛苦,但係享受呢種追求完美嘅感覺!」