藝人張智霖與佘詩曼昨日宣傳《十月初五的月光》電影版,不在場的唐文龍慘遭眾人擺上枱,除了被屈全裸慶祝票房高收外,Chilam更鼓勵他再次力追阿佘!文:影視組

Chilam屈膝遷就,等阿佘易啲挨佢膊頭,場面搞笑!(設計對白)

幾經辛苦,「君好」總算挨到「初哥哥」膊頭喇!

大批影迷到場支持Chilam和阿佘等演員,人山人海!

張智霖(Chilam)、佘詩曼(阿佘)、薛家燕等昨日出席《十月初五的月光》電影版發布會,飾演「金勝」的唐文龍雖然缺席,卻頻頻被一眾演員擺上枱,Chilam揚言若票房大收,唐文龍將代表劇組全裸回饋觀眾。問到會否考慮穿三角褲?Chilam即耍太極:「首先票房好係必須達成嘅目標,之後再安排好節目畀大家睇!」問到有否信心騷肌肉?他大搞爛Gag:「腹肌?我會覆你機!」他又爆導演葉念琛為慶功,已成功減去20磅。

戥胡杏兒開心

對於胡杏兒與男友Philip Lee訂婚,阿佘說:「祝佢哋白頭到老,戥佢開心。」自言知道內情的Chilam卻笑稱不便回應。問到是否心急結婚?阿佘說:「我心急《十》片快啲上映。」怎料Chilam再重提當年唐文龍追求阿佘一事,他笑說:「一係金勝囉!再嚟一次!但佢唔夠膽,我問過金勝,我話嗰時唔覺有乜行動,佢話有幾次行動。」問到唐文龍有甚麼行動?阿佘爆笑說:「我都想知!(佢打畀你冇聽?)我Cut線!(依家約你去街會接受?)如果一班人OK,同埋Chilam一齊囉!」

代薛家燕笨豬跳

本來要笨豬跳的薛家燕表示驚足兩個禮拜後,最終由Chilam和阿佘頂上:「我同導演講未必拍到,Chilam好好人,佢同阿佘講唔好畀咁大壓力我,又可能覺得我年紀大,所以佢同阿佘講不如佢哋跳,我如釋重負!」