藝人陳凱琳（Grace）昨日與岑麗香及高海寧等以露腰裝配牛仔短褲襯黑Boots，為無綫《萬千星輝賀台慶》造勢，預演台慶當晚的表演項目，不過身為台慶司儀之一的Grace表演跳舞時卻企後排：「跳舞唔係我強項！」文：影視組

陳凱琳自認跳舞非強項，會努力練習。

表演跳舞時，陳凱琳企在後排！

岑麗香扭呼拉圈咁叻，風騷晒V！

高海寧自認全身最瘦係條腰，即被張繼聰取笑大髀瘦過腰。

張繼聰

陳凱琳、岑麗香及高海寧表演跳舞為台慶造勢，齊齊趷Pat！

陳凱琳、岑麗香（香香）及高海寧（高Ling）等昨日到將軍澳寶琳替本月19日的《萬千星輝賀台慶》造勢，香香率領高Ling、黃心穎、李佳芯、鄧佩儀、劉佩玥、邵珮詩、王子涵及劉溫馨，預演台慶當晚表演項目「大姐花旦歌舞團」。

拒跟風閃嫁嘉穎

台慶司儀之一Grace表演跳舞時卻企後排，她說：「跳舞唔係我強項，但會努力練。（無綫睇重你畀你再做台慶司儀？）多謝公司畀機會。」問她與男友鄭嘉穎會否效法胡杏兒及男友Philip拍拖約一年即宣布結婚？Grace說：「個個人唔同，我祝福佢！但我暫時仲想拍多啲劇。（嘉穎已到適婚年紀？）歲數冇乜所謂，好多人20歲就結婚，所以年紀唔係問題。」

而高Ling在台上自言全身最瘦是腰，即被張繼聰取笑：「我唔信你條腰瘦得過你大髀！」她立即解釋：「我係講個Shape。（最自滿係條腰？）唔係，可以再瘦啲，雖然未知台慶係咪着呢套衫，但我會再減，畀啲時間我。」

香香與男友冧爆慶生

香香則甜絲絲表示獲男友為她提前慶生：「我11月17號生日，到時應該要排舞。（男友為你慶生？）佢之前畀咗Surprise Party我，仲有花！（好冧？）都開心，禮物要17號先知。（會好似杏兒咁慶生兼公布婚事？）我祝福佢哋！但我要一步步嚟。」此外，Grace昨晨出席抗癌活動，對於嘉穎憑《天眼》與《收規華》的張繼聰及《張保仔》的陳展鵬角逐《TVB馬來西亞星光薈萃頒獎禮2015》「最喜愛TVB男主角」，她說：「知道佢（嘉穎）做戲非常叻，佢好滿足演技成就，有係獎賞，冇都開心入圍。（前緋聞男友展鵬入圍？）三個都有資格做視帝，三個都值得贏！」