手作市集近期冒起，DIY手作製品成功帶起潮流，一向興趣多多的藝人衛詩雅亦學整陶瓷手作，揚言減壓效果一流的她大玩拉坯陶瓷，並在導師Zoe指導下完成首件作品！文：鄧奶 攝：嚴偉國

詩雅表示整杯有不同的工序，所以製作時要有耐性。

用風乾後的陶瓷碟再上油燒製，便成功製成陶瓷碟。

時下流行DIY自製手作品，手作市集更開得成行成市，深受一眾年輕男女推崇。興趣多多的衛詩雅今次亦來「趁墟」，學整陶瓷手作！問到為何對陶瓷工藝感興趣，詩雅則指自己事事好奇，只要覺得開心和漂亮就會嘗試：「我係一個八卦嘅人，對樣樣嘢都好好奇，咩都想試吓，所以只要我覺得開心同靚嘅嘢就會試，而且做Artist嘅時間比較自由，所以呢度攝啲時間，嗰度攝啲，咁就令我過得更加充實啦！」

搓吓撳吓好開心

期間詩雅更即興於場內埋位「表演」拉坯，並一邊搓一邊說陶瓷手作能令她身心放鬆，減壓效果一流：「陶瓷畀我感覺好好玩，減壓亦都一流，搓吓撳吓就算幾唔開心都會變開心。不過呢個只係我其中一樣興趣，我本身仲學過好多嘢。」問到有否送過甚麼製成品給男友，她即笑說：「我學咗兩堂咋，仲未有完成品可以送畀人，下堂先有得燒隻杯咋！」

有助提升演技

問到何以拚命找尋新樂趣，她自嘲個性夠「八」，更大的原因是不同的興趣能豐富自己的人生經歷：「其實學咁多嘢，唔多唔少都因為我係一個演員，我覺得學得多嘢某程度上會令自己嘅人生經歷變得豐富，咁樣亦都有助我演戲，因為我覺得呢個係最快嘅方法去儲多啲人生經驗，好似我今次學咗陶瓷之後，發現有好多嘢係要慢慢嚟嘅，例如搓一隻杯唔係一嚟就可以整到，有好多唔同工序喺入面，所以其實學唔同嘢都會有所領悟！」