身材高挑的陳嘉桓前晚以高貴晚裝出席活動，雖然入行多年，但即將23歲生日的她卻自嘲不夠女人味，要勤練成熟媚態，希望成為一位性感的邦女郎！文：名人組

Rose自嘲未有邦女郎的成熟女人味。

黃芷晴擺揸槍甫士，莫非想做打女？

林德信坦言認識父親的緋聞密友Fiona。

谷祖琳表示沒有時間跟何嘉莉講感情事。

陳嘉桓（Rose）、谷祖琳、林德信及黃芷晴等前晚出席電影《007：鬼影帝國》預映禮，Rose笑說：「我成日幻想自己係邦女郎。（邦女郎要性感，你OK？）要練習吓，邦女郎要性感又要打，仲要有種女人味，喺高衩裙度掹支槍出嚟，我媚態始終仲未夠，或者年紀再大啲會好啲。」她又自爆快到生日：「我8號生日，都係23歲咋！生日願望係拍拖、結婚、生BB。（想拍多啲拖，變得女人味啲？）都可能係！呢輪我幫媽咪湊細佬，依家湊多啲，第時輪到我生B，湊B會熟手啲！」

谷祖琳甜品店登陸

而谷祖琳則透露將會在內地開設首間甜品店，問到投資金額？她說：「我同另外一個拍檔投資咗七位數字人民幣，內地開舖唔會平過香港，雖然佢哋租金同人工平，但因為食材係進口，同埋裝修都貴過香港好多，係我意料之外。」對於好友何嘉莉低調再婚，她即煞有介事指未有時間跟對方講感情事。

林德信想做占士邦

至於林德信以踢死兔禮服現身，並笑言想做占士邦。問到女友松岡李那是否其邦女郎？他即笑說：「好朋友。（結婚對象？）暫時未有結婚計劃，我都想結婚同埋做爸爸，但我今年先啱啱30歲，都係工作為先，Daddy都叫我咪急！」提到父親林子祥跟密友Fiona的緋聞，他強調跟葉蒨文都認識Fiona及其丈夫，大家亦有一起吃飯。