近年主力教唱歌作育英才的麥潔文(Kitman)開騷,邀得「美魔女」羅霖任嘉賓,首度開金口唱歌的她說:「年紀大怕瘀!」為演出更緊張到手心冒汗,要狂去廁所定驚! 文:音樂組

身為「美魔女」的羅霖擺甫士自信十足,不過上台唱歌就驚驚青青!

有老師麥潔文(左)拖住唱,羅霖個心有冇定番啲?

天天吻賀媽咪開騷。

歌手出身的麥潔文前晚假屯門劇院舉行個人演唱會,獲女兒陳薔天捧場,更在演出前向媽媽獻吻打氣,而丈夫江華則有工作在身未有到場,演唱會又邀得「美魔女」羅霖及馬嘉均任表演嘉賓,其中羅霖更是首次公開演出!

年紀大怕瘀

自言以學生身份任嘉賓的羅霖,跟Kitman在台上合唱《終身美麗》及《親密愛人》,穿長裙的她明顯緊張到口窒窒兼手震,其後受訪時承認為演出大為緊張,她說:「手震同手心冒汗,今晚好似返番返學年代考試咁,全日不停去廁所,年紀大怕瘀,上到台又一片空白,唔係好記得歌詞。」對於首次公開表演就要在老師面前獻醜,她說:「我係被迫,尋日得一小時綵排,今次係考天才,有咗今次經驗,下次就唔會咁驚。」她認為前晚表現有70分,問到為何不見囝囝捧場?她說:「要返學,如果佢哋嚟我仲緊張同分心。」

換上多套歌衫及大唱經典金曲的Kitman接受訪問時表示今次開騷來得太急:「好緊張,因為得個幾月籌備,個場係執死雞執番嚟,希望喺2015做埋佢,2016再有新計劃。」又稱因時間關係未能趕及穿新衫:「因為要不停改,搞到預備咗好耐嘅衫都着唔到,依家都係着番舊衫。」

「師傅」讚學得快

至於為何邀羅霖任嘉賓?她說:「佢有新歌出,相信應該OK,當宣傳吓同攞經驗,多謝佢唔嫌棄我,山長水遠嚟做嘉賓,好溫暖。」又踢爆羅霖沒時間練歌:「佢啱啱拍完戲返嚟,唔係好夠時間,都係練咗兩、三次,不過佢學得好快。」