無綫接連有花旦離巢,故急需換血並力捧一眾港姐小花!應屆港姐季軍郭嘉文當選不足三個月即獲高層曾勵珍欽點擔任其監製劇集《廉政行動2016》女主角之一,並與兩屆「星和視帝」陳展鵬有多場對手戲。《廉》劇昨日開鏡,她更被安排企中間,爬過同屆冠軍麥明詩及亞軍龐卓欣頭火速上位! 文:專案組

面孔新鮮的郭嘉文於《廉》劇飾演調查員,令她相當期待!

郭嘉文與一眾前輩進行開鏡儀式,卻獲安排靚位企正中間。

郭嘉文未卸任已獲欽點拍劇,跟「視帝」陳展鵬學嘢。

郭嘉文(資料圖片)

無綫最近致力栽培陳凱琳、蔡思貝及朱千雪等一眾港姐小花上位,擔演不少劇集的重要角色,應屆港姐季軍郭嘉文(Karmen)更在當選後不足三個月便爬過同屆的十優冠軍麥明詩及亞軍龐卓欣(Ada),獲無綫戲劇製作總監曾勵珍親自欽點,為其監製的《廉》劇演出女主角之一,並有幸與兩屆「星和視帝」兼今屆無綫頒獎禮的視帝大熱陳展鵬合作鬥戲。《廉》劇昨日進行開鏡儀式,Karmen除全程獲視帝陳展鵬傍實外,切燒豬時更獲安排企中間位,得寵程度可想而知!

前輩同場照企中間

當選不足三個月已火速擔正的Karmen開心地說:「好多謝公司畀機會,算係多戲份,一連五集去拍攝調查員嘅日常生活,再貫串成套劇,第一次對住咁多前輩,呢度任何一個人都係前輩。(今日企正中間?)其實男左女右,咁啱係女仔嘅中間啫!(怕唔怕上位上得太快?)都要睇自己嘅演戲天分,我希望努力唔會令大家失望,都想拎多啲經驗,再去試多啲唔同嘅劇集。」問到是否有傳冠軍麥明詩及亞軍龐卓欣不打算簽約無綫才輪到她冷手執個熱煎堆,Karmen說:「佢哋唔係唔簽,仲傾緊啫。其實大家都各有各忙,當選後都有唔同嘅慈善工作。(佢哋唔拍你先有得拍?)人人都有唔同興趣,好似Ada就鍾意唱歌咁,嚟緊台慶我哋就會四位一體一齊出現。」

另外,正拍攝無綫劇《城寨英雄》與《巨輪II》的陳展鵬,期待首次與邱禮濤導演合作:「睇佢電影就多,今次終於有機會合作。(希望拍電影?)梗係好啦!佢個尺度都大啲,電視劇又驚收信,希望今次可以做到啲電影方向嘅嘢。」

無綫力推夠新鮮

《廉》劇導演邱禮濤則對Karmen寄望甚殷,他接受本報電話訪問時說:「唔係隨便搵!想搵番新面孔,而且Karmen係無綫介紹,啱做就搵啦!佢個角色係一個新調查員,唔通搵個似40歲嘅人做咩!佢同陳展鵬有好多對手戲,係上司下屬嘅關係。(擔唔擔心新人難駕馭?)唔擔心,喺電視或電影圈有新面孔新鮮人係好事!」

第一手消息請下載on.cc東網iPhone/iPad/Android Apps