太太剛宣布懷第3胎的陳豪風騷出席活動，直言人生願望已提早完成，接下來輪到太太去追夢。他表示不會因公忘私，會爭取時間與老婆拍拖，並學習為對方製造驚喜，認真Sweet爆！文：影視組

陳豪風騷表示人生願望已提早完成，會爭取時間與老婆拍拖，並為對方製造驚喜。

陳茵媺生埋今胎可停工，因老公陳豪會放手讓她追求夢想。

陳豪昨午為《友邦歐陸嘉年華記者會》擔任嘉賓，獲贈巨型毛公仔，他笑說：「以前攞兩隻，依家要攞夠三隻。」他形容太太有喜後，自己心情恍如晴空，又笑指已完成心願：「係將計劃提早咗啲啫，我真係好喜歡小朋友。生完呢胎要畀老婆休息，等佢追求自己嘅夢想。（畀佢拍戲？）都想。」

爭取時間拍拖

陳豪坦言要安排工作搵奶粉錢，卻不會減少家庭生活：「要學識管理時間，冇理由以前啲人做到，我哋唔可以囉！小朋友大得好快，唔可以錯過佢哋成長點滴，我仲要抽時間同老婆拍吓拖，增進夫妻感情。（畀驚喜佢？）我唔係好浪漫嘅人，學習囉！」

談到兩名囝囝是否意識到快當哥哥？陳豪說：「大嘅1歲9個月，佢會指住媽咪個肚表情多多，但細嘅得8個月大，啱啱識坐咋！（你都好犀利喎！）唔好咁講，感謝上天囉！（太太情況點？）OK呀！多謝大家關心。」