胡定欣與胡杏兒老友鬼鬼，踢爆對方將返港慶祝生日，還暗示生日當晚隨時會有喜事宣布，告別單身成為人妻，順道為「胡說八道會」沖喜，但她絕不會爬杏兒頭。

「視后」叫胡的胡定欣正物色晚裝出席頒獎禮，希望靚爆領獎。

歐陽震華與萬綺雯谷劇，揚言收視破40點會表演脫腋毛。

杏兒被好姊妹踢爆返港慶祝生日，更隨時有驚「囍」！

文：影視組

昨日為劇集《城寨英雄》開工的胡定欣透露，該劇還有三周便完成拍攝，稍後又要為新劇《一屋老友記》開工。對於今年憑《鬼同你OT》獲讚演技進步不少，增加年底奪「視后」的呼聲，甚至舊愛馬國明亦睇好她，定欣大方地說：「係咩？多謝佢支持我，咁我都會繼續努力！其實今年好開心，套劇有好口碑同收視，希望以後每年都有套代表作，但都要靠啲運氣。（頒獎禮準備着得性感啲？）又唔一定，但會盡人事靚爆佢。」

爬唔切姊妹頭

談到好姊妹胡杏兒即將生日，定欣表示當日要開工至翌日早上，故未能與對方慶祝，但已備案稍後補祝。問到今年會否是杏兒最後一個單身生日？定欣笑說：「知佢會返嚟過生日，咁睇吓當日有冇嘢宣布，有冇人送份大禮畀佢！（會唔會爬佢頭結婚？）爬唔切！其實最緊要有個愛人同佢慶祝啫，希望佢快啲，有啲喜事沖喜吓『胡說八道會』，搞旺個場。」

Bobby剃毛谷收視

至於有份衝擊「視帝」的歐陽震華（Bobby）昨日與萬綺雯到電台宣傳劇集《東坡家事》。兩人表示劇集首周平均收視達24點，Bobby誇下海口指如果高收40點，將表演剃腋毛！對於無綫內部頻有變動，他坦言台前幕後均有不少新面孔，又透露早前衝破萬難與無綫簽約：「咁大機構，名牌嚟嘛，唔做呢間做咩呀？本來想簽50年約，但驚冇咁長命，依家簽兩年兩套。」

另有網友指萬綺雯在《東》劇中疑似講「O唔OK」，無綫回應指經監製再三翻查，指對白並非英語，而是「好唔好啲」。