對於Winkie被指打傷其他女拍檔，又傳出與眾人不咬弦，唐紫睿接受電話訪問時說：「話明真人騷要真打，我哋好多個都受咗傷，大家負傷出賽，睇吓邊個捱到最後！（Winkie打到你哋又傷又喊？）我同佢一啲都唔熟，係拍節目先知係邊個，佢嘅嘢我唔回應，節目拍低咗所有女仔好同唔好嘅一面，等觀眾去判斷。（發生咗不愉快事件？）就算係都等當事人企出嚟講，我就唔會同佢做朋友囉！」

鄧洢玲

鄧洢玲（阿旦）說：「佢可能唔係好識收力，對住導師都好肉緊，但佢唔係最打得嗰個。打得狼冇錯嘅，不過有次練習佢出盡力，當時大家好新又冇用牙膠，真係畀佢打到，痛起上嚟我都喊咗出嚟，但唔係因為畀佢打傷，之後都有繼續練對打。」而鄧穎芝說：「比賽損傷在所難免。（Winkie打傷你哋？）佢揪唔揪得出街就知，不過練習時真係唔使出盡全力，佢打到阿旦（鄧洢玲）個嘴，又同唐紫睿發生口角。（不和？）我哋之中有人好討厭佢，佢成日上網暗寸其他人，得罪人咗人又唔知……拍呢個節目，我都同佢發生咗啲事而唔啱。」劉燕妮亦「爆大鑊」：「佢唔識控制自己，出盡力打人，但其他女仔就個個都就住佢！大家係咪嬲佢我唔清楚，不過嚟嚟去去都見佢自己一個，唔會黐埋其他人度，佢都話明唔係嚟交朋友啦！」