反變紅娘 盛朗熙認多仔

廣得掂留港發展

有「小李英愛」之稱的藝人盛朗熙為上海人，2013年隻身來香港發展演藝事業，問到當初為何有此決定，她坦言與自己的性格有關：「我係嗰啲真係決定咗做咩，就會好盡力去做嘅人，當時我又覺得因為香港同上海都係中國嚟，所以我覺得冇咩所謂，只係轉咗個城市，當時選擇咗做呢行，咁就嚟喇，冇諗太多！」她又提到當初來香港做演員沒有徵詢過父母的意見，他們一開始以為自己只是「玩玩吓」，但後來知道自己下定決心，作為父母當然亦會全力支持女兒的選擇：「我嗰時覺得嚟就嚟囉，都冇同佢哋講太多，佢哋一開始係有啲擔心嘅，但之後佢哋可能Feel到我真係好認真咁想做一個好嘅演員，所以都接受咗，我都好多謝佢哋！」

一個女生去到一個全新的環境生活，必然有很多地方未能適應，而且會遇到很多困難，初來香港的Joy除了身邊缺乏朋友的支持、偶爾會覺得孤單外，她要面對的最大難題必定是語言：「第一個困難就係廣東話啦，因為啱啱嚟嘅時候我係聽都唔係好識聽，但係我覺得學多一個語言都好嘅，唔一定係要為咗做呢行，對於我自己都係一件好事嚟！」她透露當時會每日強迫自己多講廣東話，又會靠聽新聞去學習，在短短兩年間，她的廣東話可謂有大躍進：「之後我都有特登搵老師教我講廣東話，因為有時以為自己發到個音，但其實係完全唔啱嘅，所以依家可以同人正常咁傾偈，我已經覺得好開心！」

唔覺得自己好靚

講到Joy之前飾演過野蠻女友的角色，問到現實生活中是否亦會對男友發脾氣？她笑說：「睇吓係咩人，同邊個一齊啦！其實我係嗰種鍾意同自己男朋友打打鬧鬧嗰啲！」而當大家都認為靚女必定多人追的時候，她就透露身邊的男性朋友遠遠比追求者多：「第一，我唔覺得自己好靚，第二，我覺得可能係自己個性問題，我鍾意同男仔玩，但我係當佢哋係好好朋友，所以我畀人哋嗰種氣場，人哋都會當我係好好朋友，之前讀書都係好朋友多過追求我嘅人！同埋之前啲男仔反而係追我啲朋友多，話阿Joy你幫我要佢個電話吖！」不過她未有因此而覺得可惜，認為多男性朋友是一件好事：「有啲女仔嘅朋友可以傾一啲心事，但如果你同男仔嘅朋友傾可能會有一啲唔同嘅意見！」至於她的擇偶條件，Joy表示對方的性格必須與自己的個性相配：「我覺得自己一定係鍾意個性同我好夾、好啱嘅男仔啦，可能會陽光啲、健康啲、孝順啲嘅！」

要做就做到最好

Joy的外表一向予人斯文、柔弱的感覺，但她就坦言自己的性格與外表不符：「我覺得自己內心比較強，大家可能都會覺得阿Joy你做呢樣嘢一定唔得啦，但反而我真係做到，好似我之前拍咗一套電影叫《年輕時代》，都係講緊一個女仔外表好似好斯文咁，但其實內心係一個野蠻女友，我就覺得嗰個角色好似我嘅，同埋自己嘅個性可以有好多唔同嘅戲路去做！」她又承認自己是一個硬頸的人，認為每一個藝人剛入行時都會抱着同樣的心態：「人哋愈覺得你唔得，你更加要證明畀佢哋睇我係得嘅，唔單單係做呢一行，做任何工作都係要有呢種心態，既然選擇咗去做呢樣嘢，就應該做到最好畀人哋睇，如果你只係試吓，咁就不如唔好嘥時間喇！」

空中瑜伽練線條

身為藝人的形象十分重要，Joy對自己的外形亦很有要求，縱然已經非常苗條，她透露閒時亦會去做運動Keep Fit：「因為覺得自己有時上鏡有啲肥，希望可以Keep得實啲，我有Keep住做空中瑜伽，覺得幾啱我，而且啱女仔啲嘅，因為唔想做到好多肌肉咁，希望有一個好好嘅線條，係健康嘅！」

後記：香港，只係工作嘅地方！

正如Joy所說，小記認為她的性格與外表絕對不同，言談間讓人覺得她並不如外表般「嬌滴滴」，反而給人一種非常捱得的感覺，當問到經常要香港、上海兩邊飛，會否覺得辛苦？她說：「唔會，香港大部分都係工作，返到上海就會Relax一啲，陪吓屋企人，我覺得咁樣嘅生活都唔錯吖！」一個女生能有穿州過省到異地發展的勇氣，再加上其不屈不撓的性格，相信Joy將來必定能在事業上闖出一片天！

文、攝：戴菲亞