清潔香港人人有責，藝人當然更瞓身出力，黃芷晴、林熹瞳、梁雨恩、郭田葰、古天祥與黃竣鋒昨日以義工身份到沙灘執垃圾。無懼猛烈陽光的芷晴細心執拾，連玻璃碎都唔放過；而梁雨恩執拾時發現千奇百怪的垃圾，笑言當中竟有「化寶盆」！

古天祥（右起）、林熹瞳、黃芷晴、梁雨恩與黃竣鋒清潔香港不遺餘力。

黃芷晴（後）和林熹瞳執垃圾時非常細心。

梁雨恩與郭田葰呼籲市民為環保出力。

黃竣鋒（左）與古天祥兩名大隻佬合力搬輪胎。

執完垃圾的黃芷晴（左）和林熹瞳歎番樽飲品。

藝人黃芷晴、林熹瞳、梁雨恩、郭田葰、古天祥和黃竣鋒昨日到深井出席《Ecovision Asia清潔香港2015》活動，無懼猛烈陽光的黃芷晴和林熹瞳執垃圾最仔細，就連小如玻璃碎的垃圾都一一執拾，為環保盡心盡力。

芷晴對清潔沙灘很賣力，但自家清潔卻靠爸爸黃日華提醒，她說：「自己房梗係會執，我阿爸最鍾意就係話我唔執房。（內衣褲隨意放？）咁又唔會，要洗就會放落個籃度。」而忘形暴曬的林熹瞳笑言其實不可再黑：「驚再黑啲，夜晚會見唔到我。」

郭田葰隔空斷症

在清潔沙灘過程中未有停手的梁雨恩表示，執拾時發現千奇百怪的垃圾：「最神奇係喺沙灘發現化寶盆！」又指亦有不少煙頭和膠杯膠碟，希望市民注重環保，她表示會以身作則，多乘坐公共交通工具：「劉嘉玲都去咗搭巴士啦！」

另外，一班男士亦落力清潔，曾在澳洲擔任急症室醫生的郭田葰坦言喜歡做義工，更會在電視城「義診」，不僅發現同事有甲狀腺病，更曾透過電話隔空推斷某藝人患盲腸炎：「好彩發現得早，遲咗搞到潰爛就大件事。」

黃竣鋒游水被望

談到該海灘是拍拖勝地，承認喜愛在海灘欣賞美女的古天祥卻不敢亂答：「我同我Honey都鍾意揸電單車周圍去，所以架車先係我拍拖勝地。」而黃竣鋒表示曾在海灘游泳時被喪望：「可能係條泳褲太細，我游水係鍾意條褲實啲。」

文：影視組