升呢老闆娘的陳敏之昨日為慶祝餅店開業一周年及第五間分店開幕，大搞剪綵儀式，揚言不會因餅店生意而減產的她獲老公William「隱身」撐場！她自爆老公對於她身兼兩職不但沒有詐型，更大讚她相當叻女！文：專案組

升呢老闆娘的陳敏之餅舖第五間分店開幕，當然要切蛋糕慶祝啦！

梁烈唯與陳敏之老友鬼鬼，搭晒膊頭合照。

陳敏之與一眾好友祝酒，場面熱鬧。

陳敏之昨日在金鐘新店舉行餅店Blesscuit開業一周年暨新店開幕剪綵儀式，其餅店開業短短一年已開到第五間分店，本月更衝出香港，在澳門開分店，敏之希望能盡快衝出亞洲，分享祝福給更多人：「我最想就梗係可以喺英國開一間分店，因為我哋啲包裝同風格都好啱嗰邊！」問到升呢老闆娘後會否減產，她說：「唔會，只係咁啱Timing夾到，嚟緊我都會投身返去拍嘢！」

分身有術拒減產

現場除了有敏之媽咪及一班好友如梁烈唯等撐場外，老公雷偉信（William）亦有到場支持，惟因怕醜未有公開露面，敏之笑說：「我老公都有嚟，但佢怕醜，唔知匿埋咗喺邊。」問到身兼兩職的她有否被老公投訴，她說：「佢好支持我，反而估唔到我真係可以兩者都兼顧到，都覺得我叻女嘅。不過佢都覺得我壓力大，因為我依家成個腦都係餅，佢仲話瞓覺嗰陣都聽到我講緊舖頭啲嘢。」問到今年台慶視帝視后心水，她表示會投陳展鵬一票，至於視后方面則因太多好姊妹牽涉其中而選不下手，於是支持汪明荃。

星級「阿茂」狂吸金

其實近年不少藝人紛紛撈過界化身「阿茂」開餅店，憑着明星效應吸引大批捧場客，賺到盆滿缽滿。如前港姐冠軍謝寧2008年與朋友合資開設餅店「曲奇四重奏」、謝霆鋒開設的曲奇店「鋒味」及古巨基去年在中環與太太Lorraine開設的糕餅店「Alice Wild Luscious」，都吸引不少人光顧。