將在光棍節補擺喜酒的古巨基踢爆老婆Lorraine近日積極收身，不過基仔嫌這位「圓」美人妻仍有肉地，幸好有發表愛的宣言冧愛妻補鑊，還鼓勵老婆在擺酒當晚變身爆乳新娘，解放四吋事業線！ 文：音樂組　攝：樊愛慈

基仔希望Lorraine於婚宴上晒四吋事業線。

基仔提議Lorraine晒事業線，Mani笑說：「佢有冇架？」

「愛妻號」基仔幾經艱苦終於拉到Lorraine合照。

古巨基昨日與經理人霍汶希（Mani）出席全新果汁品牌發布會，基仔透露今次果汁生意由太太Lorraine與友人夾份投資，但當記者要求基仔與老婆合照時，怕醜的古太甚為扭擰兼企到離行離列，最後要基仔主動出手捉實太太，兩公婆才大方合照。

讚嬌妻識食

基仔表示未知太太今次投資金額，但笑言她懂得投資餅店及果汁生意，相當「識食」：「佢鍾意飲飲食食，見佢揀老公揀我，就知道佢『識食』啦！」他又大讚老婆自從飲自家果汁收身後變靚不少，還打趣稱回家後認不出嬌妻。

提到11月11日補擺酒，基仔稱古太近日積極減肥備戰，問到老婆的身形是否夠Fit？基仔先踩老婆有肉地，再發表愛的宣言冧妻：「我一路都唔介意佢肥定瘦，講真佢一年前註冊時都唔係瘦得去邊，但我對佢的愛唔係睇外形。」

四吋事業線

問到Lorraine在他心目中是否完美？基仔猶豫片刻說：「最重要係佢唔完美，我都愛，真係答到一額汗啦！」基仔稱老婆平日衣著保守，曾提議她在婚宴上解放性感：「提議佢Sexy些，叫佢露多少少肉，露事業線，手掌上條事業線。（你極限畀佢露幾多吋？）我自己手掌四吋事業線，佢肯定同我差唔多。」在旁的Mani聞言驚訝笑說：「佢有冇架？」