影帝黃秋生與視帝黎耀祥首度合作拍電視劇，前晚播出的首集錄得最高27點收視，成為近期首集最高收視劇集，劇中二人一場爭執戲份大鬥演技盡顯功架，獲網民熱烈討論，更讚秋生齋企都有戲。

秋生笑言主打文戲，只是Hea住演。

祥仔表示劇集反應好，希望收視節節上升。

秋生（右）與祥仔在劇中不乏對打場面。

文：影視組

黃秋生、黎耀祥（祥仔）及湯鎮業三大演技派坐鎮演出的台慶劇《梟雄》前晚首播，平均26點收視，最高27點，達175萬人次收看，成為近期首集最高收視劇集。前晚好戲連場，秋生的不慍不火碰上祥仔的癲喪，加上二人爭執、對打的場面，令觀眾看得相當緊張。記者昨日致電秋生，問到覺得26點收視成績如何？他反問：「咁好定唔好？唔知喎！（算好！）咁希望繼續好落去。」

精彩場面浪接浪

對於網民指他與黎耀祥的對打戲很好看，秋生說：「咁就叫精彩？之後我都有啲鬥智嘅戲，不過我其實幾Hea，都係啲文戲。（網民話你齋企都有戲！）咁好正常啫！唔通我變番黃秋生呀？（開心？）總之我為劇組感到開心。」

對於有網民指黎耀祥演得太緊張，秋生說：「唔係咁樣講，佢個角色性格係要咁做，如果唔咁樣做，佢嘅狂躁就會變得唔合理，我覺得佢做得好好，好合情理。」而祥仔笑言昨日收到不少朋友的支持：「好多朋友都有Send短訊畀我話有睇，自己都好彩可以喺屋企睇番，反應好好，見到好多人讚劇情緊湊，希望之後收視節節上升。」

監製信有力再上

監製王心慰說：「相信一路會好，依家先啱啱開始，尋日喺外景見到啲舖頭都喺度睇緊，好多人圍住睇，其實集集都好有張力，26點依家都已經算唔錯，但我覺得可以再好啲。」講到秋生在劇中的對白腔調很特別，她說：「劇入面佢喺鄉下出嚟，上海話都未講得正，所以專登咁演繹。」