歐陽震華（Bobby）、萬綺雯、王浩信及黃心穎昨日到街市買餸谷劇，免費獲贈五花腩的浩信被指色誘檔攤阿姐，而以特惠價買得大冬瓜的Bobby笑言藝人多着數！

一個色誘檔攤阿姐，一個出動牛肉刀，難怪浩信與心穎買餸唔使畀錢啦！

黃心穎（左起）、萬綺雯、Bobby及王浩信推住車仔買餸，逼爆現場。

與萬綺雯合力買得大冬瓜的Bobby，自誇身體健康不用戒口。

馬賽以街坊Look到街市湊熱鬧。

歐陽震華昨日率領無綫新劇《東坡家事》演員萬綺雯、王浩信、黃心穎、楊詩敏（蝦頭）、李璧琦及馬賽等到樂富街市宣傳，吸引大批市民圍觀。他們分組到檔攤買餸，不停被Fans截停索合照，最終浩信及心穎買五花腩唔使畀錢，Bobby笑指浩信色誘檔攤阿姐搞到面青青，而他則以超特惠價買到大舊的冬瓜及蜜瓜！

東坡肉照食

事後Bobby與萬綺雯承認藝人買嘢多着數，Bobby說：「頭先檔主係男人嚟，但我男女都有Fans嘅，啲人會畀我買先，咁我通常會排隊，又唔會好狼，唔會買橙送個蜜瓜嚟嗰啲。」

提到年前骾親入院，問到自此有否戒口？Bobby笑說：「我要澄清嗰次係意外，我唔係長期病患者！（東坡肉咁肥照食？）啱啱Check過，醫生話我仲正常過佢，我壞膽固醇指數剛剛好，好嘅就爭啲，所以仲可以食肥膩嘢！（太太管住你飲食？）哈哈！都未同佢計，當然女性忍口方面好過男性，我以前鍾意食咩就掃晒，依家食少少，或者分兩餐。」

男配信心大增

至於心穎則透露兒時在附近居住，常陪媽咪買餸，目的是要買肚臍餅食，浩信則狂讚太太陳自瑤有廚藝天分，外出吃過美味佳餚後便能自學炮製同等菜式！提到前晚在新加坡星和頒獎禮勇奪男配角獎，浩信直言對之後的頒獎禮更有信心：「今年係我第十年入行，亦係第一次喺新加坡得獎，係幾好嘅里程碑！未試過得獎喊，但呢晚好感動，十年嘅畫面出晒嚟。（太太直擊你得獎？）冇呀！冇直播，但我有拎住獎自拍畀佢睇。（點慶祝？）唔使佢煮，出去食啦！」

文：影視組