長和系高層霍建寧的太太霍何綺華昨日以香港乳癌基金會主席身份出席《粉紅滋補煮意慈善烹飪班》活動，其好友兼著名律師馬豪輝太太馬廖千睿則擔任烹飪導師，教煮鮑魚和花膠等海味。霍太說：「好難得搵到馬太嚟做導師，佢之前出過書幫我哋基金籌款。今年係我哋基金10周年，講乳癌風險，要做運動，都市生活緊張，今日有靚廚房，又有贊助商提供海味，煮嘢食可以Relax吓，同埋將馬太嘅秘方公諸於世。」

霍何綺華笑言要學煮鮑參翅肚，以便招呼客人。

霍太（左）對馬太的廚藝大表讚賞。

霍太坦言食得清淡：「鮑參翅肚好少掂，係請客先整，平時食蒸肉餅。試過喺屋企整煲仔飯請客，大受歡迎。作為乳癌康復者，飲食要3低1高，低油低鹽低糖，高纖維，咁樣健康就會黐住你。今日烹飪班有50人參加，嚟緊仲有一日，要加場，預計籌到20萬，要跟馬太學一技傍身。」

炮製60人大餐

另外，馬太表示因現在很流行吃花膠才教煮花膠：「老中青同癌症康復者都食，今日教煮嘅有我擅長嘅嘅菜式，因為先生鍾意請客，試過煮60幾人食嘅嘢，喺屋企食Buffet，煮30幾個餸。（再出食譜？）已經出咗兩本，都係為慈善機構籌款，而第一本就係幫香港乳癌基金會籌款。如果出第三本都會幫慈善機構籌款，會講東南亞美食，依家流行食越南菜。」