周柏豪前日化身「平民暖男」與粉絲搭電車傾心事，他透露近日曾與媽咪「行孖咇」搭港鐵及電車，而一向是影相發燒友的柏豪自爆旅行時會邀請媽媽任私人模特兒：「見到靚景就會叫佢企定定畀我影，但叫佢影番我就會好勞氣，可能佢唔係好識用數碼機。」

為咗同香港街景影靚相，柏豪不惜「危危乎」坐喺欄杆邊。

柏豪和粉絲乘坐的電車浩浩蕩蕩在大街行駛，吸引途人圍觀。

他感慨平日的急促生活猶如「坐監」，幸好可以忙裏偷閒：「平時做嘢乜都要快，經理人就好似『獄長』咁押解我上台做嘢，有時想偷番啲時間畀自己，返到屋企就會坐喺梳化諗吓嘢，將生活節奏調慢啲。」他又自爆為年底在澳門新濠影滙舉行的個唱積極健身，但未有計劃晒肌益粉絲。