模特兒張可義入行3年，經歷過高低潮，但勝在性格樂觀。面對感情事，她是個甘願為愛放棄一切的人，更力Sell賢良淑德的一面。曾到布吉拍攝婚紗廣告的她，更甜笑表示合作的男Model對她傾心，人肉速遞「外賣鴨」一招令她相當感動！

Emily表示能為男友付出所有，各位男士行動啦！

Emily早前到布吉拍廣告，更被合作的男Model「送鴨」力追。

在娛圈發展了三年的Emily會努力裝備自己，繼續奮鬥。

Emily表示男友不一定要靚仔有錢，只要溝通到就足夠。

入行做模特兒踏入第3年，張可義（Emily）坦言有開心有失落，但慶幸開朗的性格令她仍企硬於圈中奮鬥：「做呢行外表好重要，曾經因為情緒問題令賀爾蒙失調，成塊面爛晒爆晒瘡，嗰陣有客叫我開工，一見到我真人即刻彈Job，係我第一次畀人彈Job，佢哋好關心我，仲介紹啲中西醫畀我，但嗰一刻真係超唔開心。」

一顆恨嫁的心

剛經歷失戀的Emily表示需要時間調整心情，才會在愛情路上重新出發：「我揀老公要求好低，低到成日畀啲朋友話我冇眼光，唔使靚仔亦唔需要有錢，兩個人之間有共同興趣、目標，一齊先會開心。我係一個好恨結婚同生小朋友嘅良家婦女，煮嘢食就基本家常小菜都識。」

模特兒或藝人的身份有時難免被人以有色眼鏡看待，Emily卻從未擔心過：「唔驚另一半介意，識好多男士都覺得女仔做呢行交際能力好好，我只擔心一樣嘢，怕佢哋係『外貌協會』睇樣，見到靚女就覺得易呃！」她更揚言甘願為愛情放棄一切，把另一半當作自己的全部：「真係可以『捨己』、犧牲、『卑躬屈膝』！如果男朋友開餐廳冇人洗碗，我可以幫手做清潔阿姐！當然首要條件係有個適合嘅人，如果我覺得個男人愛我嘅話，佢會了解我同尊重我，呢樣嘢係雙向。」

男模「送鴨」力追

向來熱愛周遊列國的Emily分享難忘「艷遇」，回想起仍忍不住甜笑：「因為勁鍾意去旅行，最難忘有次一間婚紗公司邀請我去布吉影相，嗰次係影咁多婚紗相以嚟，唯一一次有男Model一齊影，當時真係好開心！個男Model係北京人，我哋去咗4日，最後嗰日佢同我食消夜，夜晚喺酒店泳池邊飲酒食嘢，佢話好鍾意我，叫我下次去北京要搵佢，佢會掛住我！之後我去內地選中國小姐，佢一知我喺北京就特登搭車去機場接我，仲買咗最出名嘅片皮鴨畀我，見咗15分鐘都冇，但係好感動！」問到會否考慮發展異地戀，她坦言不抗拒但首選仍是「港男」：「易啲溝通同覺得香港男士好細心同體貼。」她更表示會積極考慮旅行結婚。

咪咪，拜託不要減磅！

身形發福不少的Emily笑言要努力Keep Fit：「之前好努力減肥，上圍縮晒水，突然諗到不如增肥之後再減，點知一開始增肥就停唔到，其他部位一定要減番。Keep Fit都係做運動為主，最緊要唔食消夜。」

後記：蚊蚊，拜託忍口一下！

拍攝現場蚊極多，穿三點式的Emily全身中招，為免用手搔癢令皮膚出現一道道紅痕，她堅持忍住痕癢，若無其事般繼續展露甜美笑容影靚相，敬業態度認真抵讚！

文：陳丹　

攝：劉斌